(ឡុងដ៍)៖ ឯកអគ្គរដ្ឋទូតអ៊ីស្រាអែលប្រចាំនៅចក្រភពអង់គ្លេស លោកស្រី Tzipi Hotovili បាននិយាយថា មិនមានវិបត្តិមនុស្សធម៌ទេនៅក្នុងតំបន់ហ្គាហ្សាស្ទ្រីប មុនពេលការវាយលុកយោធាដែលរំពឹងទុកលើតំបន់នេះ ដែលវាផ្ទុយនឹងការអះអាងពីអង្គការនានា រួមទាំងអង្គការសហប្រជាជាតិ និងអង្គការសុខភាពពិភពលោកផងដែរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី១៦ ខែតុលា ឆ្នាំ២០២៣។

នៅមុនការវាយលុក អ៊ីស្រាអែលបានកាត់ផ្តាច់ការផ្គត់ផ្គង់ទឹក ប្រេងឥន្ធនៈ អគ្គិសនី និងអាហាររបស់ហ្គាហ្សា។ រដ្ឋមន្ត្រីការពារជាតិអ៊ីស្រាអែល លោក Yoav Galant បានពណ៌នាថាវាថាជា «ការឡោមព័ទ្ធទាំងស្រុង» ដោយបន្ថែមថា «យើងកំពុងប្រយុទ្ធនឹងសត្វមនុស្ស ហើយយើងកំពុងធ្វើសកម្មភាពតាមនោះ»។

អ្នកធ្វើបទបង្ហាញរបស់សារព័ត៌មាន Sky News លោក Kay Burley បានសួរទៅកាន់លោកស្រី Hotophilly ថា «ខ្ញុំកំពុងសួរអ្នកអំពីជនស៊ីវិលស្លូតត្រង់ ដែលបានបាត់បង់ជីវិត នៅពេលនេះ ហើយឥឡូវនេះអ្នកកំពុងនិយាយថា វាមិនមែនជាវិបត្តិមនុស្សធម៌ទេ តើអ្នកអាចនិយាយបានដោយរបៀបណា?» លោកស្រីឯកអគ្គរដ្ឋទូតអ៊ីស្រាអែលរូបនេះបានឆ្លើយតបថា «វិបត្តិមនុស្សធម៌បច្ចុប្បន្ន មាននៅក្នុងប្រទេសអ៊ីស្រាអែល»។

គួរបញ្ជាក់ថា អង្គការសហប្រជាជាតិ និងអង្គការមនុស្សធម៌មួយចំនួនបានព្រមានថា មហន្តរាយមនុស្សធម៌កំពុងកើតឡើងនៅទូទាំងតំបន់ហ្គាហ្សា ដែលមានផ្ទៃដីត្រឹមតែ ៣៦៥ គីឡូម៉ែត្រការ៉េ ដែលជាជម្រករបស់ប្រជាជនជាង២លាននាក់។

អ្នកនាំពាក្យរបស់អង្គការសុខភាពពិភព លោក Tarek Jasarevic បាននិយាយថា ការទាមទាររបស់អ៊ីស្រាអែលឱ្យជនស៊ីវិលចំនួនបែបនេះ ហើយនៅលើការជូនដំណឹងខ្លីបែបនេះគឺជា «ការកាត់ទោសប្រហារជីវិត» សម្រាប់ប្រជាជនប៉ាឡេស្ទីនជាច្រើន ដោយបន្ថែមថា «វាមិនអាចទៅរួចទេក្នុងការជម្លៀសអ្នកជំងឺ ដែលងាយរងគ្រោះនៅក្នុងមន្ទីរពេទ្យពីភាគខាងជើងហ្គាហ្សា» ។ គាត់បានបន្ថែមថា «ការស្នើឱ្យបុគ្គលិកសុខាភិបាល (ដឹកជញ្ជូនអ្នកជំងឺដែលងាយរងគ្រោះនៅក្នុងតំបន់សង្រ្គាម) គឺហួសពីឃោរឃៅ»៕

រូបភាពពី AFP