(ម៉ានីល)៖ យោងតាមឯកសារផ្លូវការដែលបង្ហាញនៅថ្ងៃសុក្រនេះ ប្រធានាធិបតីនៃប្រទេសហ្វីលីពីន លោក ហ្វឺឌីណាន់ ម៉ាកូស ជូនៀ (Ferdinand Marcos Jr) បានសម្រេច​លុបចោល ថ្ងៃឈប់សម្រាកសាធារណៈមួយ ដែលអបអរខួបចលនាបដិវត្តន៍ ដែលបានផ្តួលរំលំឪពុករបស់លោក ដែលជាមេដឹកនាំផ្តាច់ការ ឱ្យធ្លាក់​ពីអំណាច។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី១៣ ខែតុលា ឆ្នាំ២០២៣។

ចលនាបដិវត្តន៍ «អំណាចប្រជាជន ឬ People Power» ដែលគាំទ្រដោយយោធា កាលពីខែកុម្ភៈ ឆ្នាំ១៩៨៦ បានបិទបញ្ចប់របបដឹកនាំ​បែបផ្តាច់ការរបស់លោក ហ្វឺឌីណាន់ ម៉ាកូស ស៉ីនៀ (Ferdinand Marcos Sr) ហើយបានបង្ខំឱ្យគ្រួសាររបស់លោក ត្រូវនិរទេសទៅ​កាន់រដ្ឋហាវ៉ៃនៃសហរដ្ឋអាមេរិក។ ក្រុមអ្នករិះគន់បានចាត់ទុក របបដឹកនាំផ្តាច់ការរបស់លោក ម៉ាកូស ស៉ីនៀ ជាសម័យកាលខ្មៅងងឹតមួយ ពោរពេញដោយ ការរំលោភបំពានសិទ្ធិមនុស្សនិងអំពើពុករលួយ ដែលបានធ្វើឱ្យប្រទេសស្ថិតក្នុងសភាពក្រីក្រ។

ថ្ងៃទី២៥ ខែកុម្ភៈ ត្រូវបានប្រកាសជា «ថ្ងៃបុណ្យជាតិពិសេស» កាលពីឆ្នាំ២០០០ ដោយអតីតប្រធានាធិបតីហ្វីលីពីន លោក Joseph Estrada។ ក្រុមសកម្មជនសិទ្ធិមនុស្ស តែងតែរៀបចំការប្រមូលផ្តុំនៅថ្ងៃនោះ ដើម្បីអបអរខួបនៃការស្តារលទ្ធិប្រជាធិបតេយ្យឡើងវិញ នៅក្នុងប្រទេសអាស៊ានមួយនេះ។

គួរបញ្ជាក់ថា លោក ម៉ាកូស ជូនៀ បានជាប់ឆ្នោតជាប្រធានាធិបតីហ្វីលីពីន កាលពីឆ្នាំ២០២២ ហើយមនុស្សភាគច្រើនរំពឹងថា រូបលោក​នឹងលុបចោលថ្ងៃបុណ្យជាតិខាងលើភ្លាមៗ ក្រោយពេលស្បថចូលកាន់តំណែងជាផ្លូវការ។ ប៉ុន្តែលោក ម៉ាកូស បានលើកបុណ្យជាតិនោះ ទៅថ្ងៃទី២៤ ខែកុម្ភៈ វិញសម្រាប់ឆ្នាំនេះ។ យ៉ាងណាក្តី យោងតាមសេចក្តីប្រកាសថ្មីមួយរបស់ប្រធានាធិបតី ដែលចែងអំពីថ្ងៃបុណ្យជាតិឈប់សម្រាក សម្រាប់ឆ្នាំ២០២៤ ចុះកាលបរិច្ឆេទថ្ងៃទី១១ ខែតុលា និងចេញផ្សាយនៅថ្ងៃសុក្រនេះ គឺពុំមានការលើកឡើងអ្វីទាំងអស់ អំពីថ្ងៃខួបបដិវត្តន៍ឆ្នាំ១៩៨៦៕

">

រូបភាពពី AFP