(ហ៊្សេរុយសាឡិម)៖ រដ្ឋមន្រ្តីថាមពលនៃប្រទេសអ៉ីស្រាអែល លោក Israel Katz នៅថ្ងៃព្រហស្បតិ៍នេះ បានប្តេជ្ញាថាប្រទេសរបស់លោក នឹងមិនអនុញ្ញាតឱ្យធនធានចាំបាច់ផ្សេងៗ ឬមួយក៏ជំនួយមនុស្សធម៌អាចចូលទៅកាន់តំបន់ Gaza បានឡើយ រហូតទាល់តែក្រុម Hamas ដោះលែងមនុស្សទាំងអស់ ដែលពួកខ្លួនបានចាប់យកទៅធ្វើជាចំណាប់ខ្មាំង អំលុងការឆ្មក់ចូលវាយប្រហារលើអ៉ីស្រាអែល កាលពីចុងសប្តាហ៍មុន។ បើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី១២ ខែតុលា ឆ្នាំ២០២៣។

លោក Katz បានគូសបញ្ជាក់ក្នុងសេចក្តីថ្លែងការណ៍យ៉ាងដូច្នេះថា «ចង់បញ្ជូនជំនួយមនុស្សធម៌ចូលទៅ Gaz ឬ? គ្មានការបើកឡើងវិញ​ជាដាច់ខាត នូវការផ្គត់ផ្គង់អគ្គិសនី ទឹក ឬមួយក៏ប្រេងឥន្ធនៈ រហូតទាល់តែចំណាប់ខ្មាំងទាំងឡាយ ដែលត្រូវបានចាប់យកទៅពីអ៉ីស្រាអែល បាន​វិលត្រឡប់មកផ្ទះវិញ»។ ពលរដ្ឋអ៉ីស្រាអែល រួមជាមួយជនបរទេស និងអ្នកមានសញ្ជាតិ២ សរុបប្រហែលជា១៥០នាក់ ត្រូវបានចាប់ធ្វើជា​ចំណាប់ខ្មាំង បញ្ជូនទៅកាន់តំបន់ Gaza Strip ដោយពួកសកម្មប្រយុទ្ធរបស់ Hamas អំលុងការវាយប្រហារទ្រង់ទ្រាយធំមួយ កាលពីថ្ងៃសៅរ៍​ចុងសប្តាហ៍មុន ដែលបានផ្តាច់ជីវិតមនុស្សលើស១,២០០នាក់ នៅតាមក្រុងនិងសហគមន៍អ៉ីស្រាអែល ដែលស្ថិតនៅក្បែរព្រំប្រទល់​ដែនដីប៉ាឡេស្ទីនមួយនេះ។

គួរបញ្ជាក់ថា ជាការឆ្លើយតប យោធាអ៉ីស្រាអែលបានបើកប្រតិបត្តិការវាយប្រហារតាមផ្លូវអាកាស ឥតសំចៃដៃនោះឡើយប្រឆាំងនឹងក្រុម Hamas នៅតំបន់ Gaza Strip ដែលបានបណ្តាលឱ្យមនុស្សយ៉ាងហោចជាង១,២០០នាក់ស្លាប់។ អ៉ីស្រាអែលក៏បានប្រកាសវិធានការ​បិទខ្ទប់តំបន់ Gaza ទាំងស្រុងផងដែរ ដោយកាត់ផ្តាច់ការផ្គត់ផ្គង់អគ្គិសនី ស្បៀងអាហារ ទឹក ព្រមទាំងឥន្ធនៈ ចូលទៅកាន់តំបន់នោះ។ កាលពីថ្ងៃពុធសប្តាហ៍នេះ ស្ថានីយផលិតថាមពលតែមួយគត់ របស់តំបន់ Gaza លែងអាចដំណើរការបានតទៅទៀត បន្ទាប់ពីអស់ឥន្ធនៈ៕

រូបភាពពី AFP