(សិង្ហបុរី)៖ នាយករដ្ឋមន្ត្រីថៃ លោក Srettha Thavisin នឹងទៅបំពេញទស្សនកិច្ចផ្លូវការនៅប្រទេសសិង្ហបុរីនៅថ្ងៃព្រហស្បតិ៍ (១២ តុលា) តបតាមការអញ្ជើញរបស់នាយករដ្ឋមន្ត្រី លោក Lee Hsien Loong នេះបើតាមក្រសួងការបរទេសសិង្ហបុរី បានឱ្យដឹងនៅថ្ងៃទី១១ ខែតុលា ឆ្នាំ២០២៣។

វា​​នឹងក្លាយជា​ដំណើរ​ទស្សន​កិច្ច​ជា​ផ្លូវ​ការ​លើក​ដំបូង​របស់​ លោក Srettha ​នៅ​ប្រទេស​សិង្ហបុរី ក្នុងនាមជាប្រមុខរដ្ឋាភិបាលថៃ។

ក្រសួងការបរទេសសិង្ហបុរី បាននិយាយនៅក្នុងសេចក្តីថ្លែងការណ៍មួយដូច្នេះថា «នាយករដ្ឋមន្ត្រីថៃ លោក Srettha នឹងទទួលបានការស្វាគមន៍យ៉ាងកក់ក្តៅ ហើយនឹងជួបជាមួយលោកប្រធានាធិបតី Tharman Shanmugaratnam នៅវិមាន Istana នៅថ្ងៃទី ១២ ខែតុលា ឆ្នាំ២០២៣»។

សេចក្តីថ្លែងការណ៍បានបន្ថែមថា «លោកនឹងជួបនាយករដ្ឋមន្ត្រី Lee ដែលនឹងរៀបចំអាហារថ្ងៃត្រង់ផ្លូវការសម្រាប់លោកផងដែរ»។

ក្រសួងការបរទេសបានបន្ថែមទៀតថា លោក Srettha ដែលនឹងត្រូវបានអមដំណើរ ដោយមន្ត្រីជាន់ខ្ពស់មកពីលេខាធិការដ្ឋាននាយករដ្ឋមន្ត្រី និងក្រសួងការបរទេសថៃ ក៏នឹងធ្វើទស្សនកិច្ចនៅផ្សារហ៊ុនសិង្ហបុរីផងដែរ៕

">

រូបភាពពី AFP