(ម៉ាឌ្រីដ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹងនៅថ្ងៃព្រហស្បតិ៍នេះថា រូបលោកកំពុងតែស្ថិតនៅក្នុងទីក្រុង Granada នៃប្រទេសអេស៉្បាញ ដើម្បីចូលរួមកិច្ចប្រជុំកំពូលមួយ ដែលមានការចូលរួមពីមេដឹកនាំ មកពីបណ្តាប្រទេសអឺរ៉ុបសរុបជិត៥០។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី៥ ខែតុលា ឆ្នាំ២០២៣។

លោក ហ្សេលេនស្គី បានបង្ហោះសារលើបណ្តាញសង្គមដូច្នេះថា «កំពុងស្ថិតនៅទីក្រុង Granada របស់អេស៉្បាញ សម្រាប់កិច្ចប្រជុំកំពូល​នៃសហគមន៍នយោបាយអឺរ៉ុប។ យើងនឹងធ្វើការនៅលើផ្លូវរួមគ្នា ហើយមានជំនួបទ្វេភាគីសំខាន់ៗ។ កូនសោគន្លឹះសម្រាប់យើង ជាពិសេសនៅមុនរដូវរងាមកដល់ គឺត្រូវពង្រឹងសមត្ថភាពការពារដែនអាកាស ហើយយើងមានរួចរាល់ផងដែរ នូវមូលដ្ឋានសម្រាប់កិច្ចព្រមព្រៀងថ្មីៗជាមួយ​បណ្តាដៃគូរបស់យើង។ ពួកយើងកំពុងតែត្រៀមរៀបចំបញ្ជាក់ឱ្យច្បាស់ ក៏ដូចជាអនុវត្តពួកវា»។

គួរបញ្ជាក់ថា ដំណើរទស្សនកិច្ចខាងលើរបស់លោក ហ្សេលេនស្គី កើតមានស្របពេលដែល លោកប្រធានាធិបតីអ៊ុយក្រែន បាននិងកំពុងតែ​ព្យាយាមបញ្ចុះបញ្ចូល សម្ព័ន្ធមិត្តលោកខាងលិច ដើម្បីស្នើសុំជំនួយសព្វាវុធ ក៏ដូចជាប្រព័ន្ធការពារដែនអាកាសបន្ថែមទៀត នៅមុនអ្វីដែលក្រុមមន្រ្តីបានព្រមានថា អាចនឹងជាការវាយប្រហារតាមផ្លូវអាកាស កាន់តែខ្លាំងក្លាថែមទៀតរបស់រុស្ស៉ី អំលុងរដូវរងា។ សព្វថ្ងៃ រុស្ស៉ីក៏បានបង្កើនការ​វាយប្រហាររួចស្រេចផងដែរ ទៅលើកំពង់ផែរបស់អ៊ុយក្រែន ចាប់តាំងពីដើរចាកចោលកិច្ចព្រមព្រៀង ដែលបានអនុញ្ញាតឱ្យមានការដឹកជញ្ជូនផលិតផលអ៊ុយក្រែនដោយសុវត្ថិភាព​ កាត់តាមសមុទ្រខ្មៅ៕

រូបភាពពី AFP