(អ៉ីស្លាម៉ាបាដ)៖ ក្រុមមន្រ្តីសុខាភិបាលនិងប៉ូលិស នៅប្រទេសប៉ាគីស្ថាន បានឱ្យដឹងថា មនុស្សយ៉ាងហោច៥២នាក់ បានបាត់បង់ជីវិត និងជាង៥០នាក់ផ្សេងទៀតបានទទួលរងរបួស នាថ្ងៃសុក្រនេះ ក្នុងការវាយប្រហារដោយបំផ្ទុះគ្រាប់បែកអត្តឃាត នៅខេត្តបាឡូជីស្ថាន (Balochistan) ដែលកើតឡើងអំលុងពិធីខួបកំណើតរបស់ មហាំម៉ាត់ ដែលជាអ្នកនាំសាររបស់ព្រះក្នុងសាសនាអ៉ីស្លាម។ នេះបើតាមការ​ចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី២៩ ខែកញ្ញា ឆ្នាំ២០២៣។

មិនទាន់មានក្រុមណាមួយ ចេញមុខទទួលខុសត្រូវថា សកម្មភាពវាយប្រហារខាងលើ​ ជាស្នាដៃរបស់ខ្លួននៅឡើយទេ ក៏ប៉ុន្តែវាបានកើតមាន ចំពេលដែលការវាយប្រហារដោយ ក្រុមសកម្មជនប្រយុទ្ធ បាននិងកំពុងកើនឡើងកាន់តែញឹកញាប់ នៅតំបន់ភាគខាងលិចប៉ាគីស្ថាន និងមុនពេល​ប្រទេសអាស៉ីខាងត្បូងមួយនេះ ត្រូវរៀបចំការបោះឆ្នោតសកល នៅខែមករា ឆ្នាំ២០២៤។ ទីតាំងនៃការបំផ្ទុះគ្រាប់បែកនោះ គឺស្ថិតនៅក្បែរ​ព្រះវិហារអ៉ីស្លាមមួយ ជាទីដែលមនុស្សម្នាបានមកប្រមូលផ្តុំគ្នា ដើម្បីត្រៀមដង្ហែក្បួន ដើម្បីអបអរខួបកំណើត មហាំម៉ាត់ ដែលត្រូវជាថ្ងៃឈប់​សម្រាកផងដែរ។

គួរបញ្ជាក់ថា ប៉ាគីស្ថានបានមើលឃើញការស្ទុះឡើងវិញ នៃសកម្មភាពវាយប្រហារដោយក្រុមសកម្មប្រយុទ្ធ ចាប់តាំងតែពីឆ្នាំមុនមក នៅពេលបទឈប់បាញ់បានដួលរលំ រវាងរដ្ឋាភិបាលនិងក្រុមសកម្មប្រយុទ្ធ TTP។ យ៉ាងណាមិញ ក្រុម TTP បានចេញមុខបដិសេធថា ខ្លួនមិនបាន​ធ្វើសកម្មភាពវាយប្រហារ នៅថ្ងៃសុក្រនេះឡើយ។ ដោយឡែក កាលពីខែកក្កដាកន្លងទៅ មនុស្សជាង ៤០នាក់ស្លាប់ ក្នុងការបំផ្ទុះគ្រាប់បែកអត្តឃាតមួយ នៅខេត្ត Khyber Pakhtunkhwa province ភាគនិរតីប្រទេស អំលុងការប្រមូលផ្តុំ របស់គណបក្សនយោបាយសាសនាមួយ៕

">

រូបភាពពី AFP