(ស៉ីដនី)៖ នៅថ្ងៃសុក្រនេះ អូស្រ្តាលីបាននិយាយថា ខ្លួននឹងដាក់កងឧទ្ធម្ភាគចក្រ តៃប៉ង់ (Taipan) ឱ្យចូលនិវត្តន៍លឿនជាងការរំពឹងទុក បន្ទាប់ពីករណីធ្លាក់ឧទ្ធម្ភាគចក្រនេះ ១គ្រឿង នៅក្បែរឆ្នេរភាគខាងកើតប្រទេសកាលពីខែកក្កដា អំលុងការធ្វើសមយុទ្ធយោធារួមគ្នា ជាមួយ​សហរដ្ឋអាមេរិក ដែលបានផ្តាច់ជីវិតសមាជិកយោធាអូស្រ្តាលី៤នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសុក្រ ទី២៩ ខែកញ្ញា ឆ្នាំ២០២៣។

រដ្ឋមន្រ្តីការពារជាតិអូស្រ្តាលី លោក រីឆាដ ម៉ាល (Richard Marles) បាននិយាយថា កងឧទ្ធម្ភាគចក្រ Taipan នឹងមិនវិលត្រឡប់មក​ហោះហើរបំពេញប្រតិបត្តិការវិញឡើយ ខណៈកន្លងមកទីក្រុងកង់បេរ៉ា បានគ្រោងចូលនិវត្តកងឧទ្ធម្ភាគចក្រនេះ នៅខែធ្នូ ឆ្នាំ២០២៤។ អូស្រ្តាលីបានបញ្ឈរជើង​ កងឧទ្ធម្ភាគចក្រ Taipan របស់ខ្លួន ក្រោយ១គ្រឿង បានធ្លាក់ចូលក្នុងសមុទ្រកាលពីខែកក្កដា នៅក្បែរឆ្នេររដ្ឋ Queensland។ ពួកវាជា​ផលិតផលរបស់ក្រុមហ៊ុន NHIndustries ដែលមានមូលដ្ឋាននៅប្រទេសបារាំង និងគ្រប់គ្រងរួមគ្នាដោយក្រុមហ៊ុន Airbus និងក្រុមហ៊ុន Lenonardo របស់អ៉ីតាលី។

គួរបញ្ជាក់ថា កាលពីខែមករា ដើមឆ្នាំនេះ អូស្រ្តាលីបាននិយាយថា ខ្លួននឹងទិញឧទ្ធម្ភាគចក្រយោធា Black Hawk ៤០គ្រឿង ដែលផលិត​ដោយក្រុមហ៊ុនអាមេរិក Lockheed Martin ក្នុងតម្លៃប្រហែល២.៨ពាន់លានដុល្លារអូស្រ្តាលី ឬស្មើនឹង១.៨០ពាន់លានដុល្លារអាមេរិក។ អូស្រ្តាលីគ្រោងយកឧទ្ធម្ភាគចក្រ Black Hawk ទាំងនោះ មកប្រើប្រាស់ជំនួសកងឧទ្ធម្ភាគចក្រ Taipan ដែលត្រូវបានធ្វើទុក្ខដោយបញ្ហាផ្នែកជួសជុលថែទាំ ជាច្រើនឆ្នាំមកហើយ។ បើតាមលោក Marles អូស្រ្តាលីបានដាក់ពង្រាយ​ឧទ្ធម្ភាគចក្រ Taipan សរុប៤៧គ្រឿង៕

">

រូបភាពពីកងទ័ពជើងទឹកអូស្រ្តាលី