(ហាណូយ)៖ នៅថ្ងៃព្រហស្បតិ៍នេះ តុលាការនៃប្រទេសវៀតណាម បានសម្រេចផ្តន្ទាទោសសកម្មជនបរិស្ថានម្នាក់ ឱ្យជាប់ពន្ធនាគារចំនួន៣ឆ្នាំ ក្រោមបទចោទប្រកាន់គេចពន្ធ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៨ ខែកញ្ញា ឆ្នាំ២០២៣។

លោកស្រី ហ័ង ធីមិញហុង (Hoang Thi Minh Hong) ជាប្រធានអង្គការមួយសំដៅលើកកម្ពស់កិច្ចការពារបរិស្ថាន ដែលលោកស្រីបានបង្កើតឡើងកាលពីឆ្នាំ២០១៣ និងគ្រប់គ្រងរហូតដល់ឆ្នាំ២០២២ បានទទួលរងការចោទប្រកាន់ពីបទគេចវេះការបង់ពន្ធសរុបចំនួន ៦.៧ពាន់លានដុង ឬស្មើនឹង២៧៤,៤៨៨ដុល្លារ ចាប់ពីអំលុងឆ្នាំ២០១២ ដល់ឆ្នាំ២០២២។

លោក បេន ស្វានតុន (Ben Swanton) ដែលជាសហប្រធានអង្គការសប្បុរសធម៌ The 88 Project បានលើកឡើងយ៉ាងដូច្នេះថា «ការផ្តន្ទាទោសខាងលើ គឺជាការឆបោកសុទ្ធសាធ... មិនគួរមានអ្នកចាញ់បោកការកាត់ទោសនេះទេ។ វាគឺជាឧទាហរណ៍ថ្មីមួយទៀត ដែលស្តែងឱ្យឃើញថា ច្បាប់ត្រូវបានប្រើប្រាស់ជាអាវុធ ដើម្បីដាក់ទោសទណ្ឌលើសកម្មជនបរិស្ថាន ដែលខិតខំតស៊ូដើម្បីជួយសង្រ្គោះ​ពិភពលោក»។

គួរបញ្ជាក់ថា ការផ្តន្ទាទោសសកម្មជនបរិស្ថានវៀតណាមខាងលើ កើតមានឡើងតែ២សប្តាហ៍ប៉ុណ្ណោះ ក្រោយដំណើរទស្សនកិច្ចរបស់​ប្រធានាធិបតីអាមេរិក លោក ចូ បៃដិន មកកាន់ប្រទេសអាស៊ានមួយនេះ ហើយអំលុងពេលនោះ កិច្ចផ្តួចផ្តើមរួមជាច្រើនត្រូវបានប្រកាស ដែលមានទាំងការការពារសិទ្ធិមនុស្សផងដែរ៕

រូបភាពពី The 88 Project