(តូក្យូ)៖ ថ្នាំព្យាបាលដ៏សំខាន់សម្រាប់ប្រឆាំងជំងឺចាស់វង្វេងវង្វាន់ អាល់ហ្សាយមើ (Alzheimer's) ទើបតែទទួលបានការអនុញ្ញាតឱ្យប្រើប្រាស់ ពីសំណាក់អាជ្ញាធរនិយតករជប៉ុន បន្ទាប់ពីថ្នាំនេះទើបតែទទួលបានការផ្តល់ភ្លើងបៃតង នៅសហរដ្ឋអាមេរិកកាលពីខែកក្កដា។ នេះបើតាមការ​ចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី២៥ ខែកញ្ញា ឆ្នាំ២០២៣។

ជប៉ុនបានក្លាយជាប្រទេសទី២ បន្ទាប់ពីសហរដ្ឋអាមេរិក ដែលបានផ្តល់ការអនុម័តយល់ព្រមចំពោះ ថ្នាំមានឈ្មោះថា Lecanemab ឬ Leqembi ដែលអភិវឌ្ឍដោយ ក្រុមហ៊ុនឱសថជប៉ុន Eisai រួមជាមួយក្រុមហ៊ុន Biogen ដែលជាដៃគូនៅសហរដ្ឋអាមេរិក។ វានឹងជាថ្នាំដំបូងនៅជប៉ុន ដែលព្យាបាលទាំងដើមចមនៃជំងឺ Alzheimer's ហើយ​ពន្យឺតការវិវត្តទៅមុខនៃស្ថានភាពជំងឺនេះ។ ការអនុម័តនេះគឺជាដំណឹងវិជ្ជមានមួយសម្រាប់ប្រទេសជប៉ុន ដែលមានប្រជាជនវ័យចំណាស់កាន់តែច្រើនឡើងៗ យ៉ាងឆាប់រហ័ស។ ប្រជាជនជប៉ុនខ្ទង់ជាង៦លាននាក់ កំពុងរស់នៅជាមួយជំងឺនេះ។

ក្រុមហ៊ុន Eisai ក៏កំពុងព្យាយាមស្វែងរកការអនុញ្ញាតឱ្យប្រើប្រាស់ថ្នាំខាងលើរបស់ខ្លួន នៅទីផ្សារដទៃទៀតផងដែរ រួមមានទាំងអឺរ៉ុបនិងចិន។ ក្រុមហ៊ុនព្យាករថា ប្រាក់ចំណូលបានមកពីការលក់ថ្នាំ Leqembi នឹងកើនដល់១ទ្រីលានយេន ស្មើនឹង៦.៧ពាន់លានដុល្លារអាមេរិក នៅឆ្នាំ២០៣០។ ខណៈក្រុមហ៊ុន Eisai កំណត់តម្លៃថ្នាំនេះថ្លៃ២៦,៥០០ដុល្លារក្នុង១ឆ្នាំ នៅសហរដ្ឋអាមេរិក តម្លៃរបស់វានៅជប៉ុន នឹងត្រូវកំណត់ដោយ​រដ្ឋាភិបាល នៅក្នុងឆ្នាំនេះ។

គួរបញ្ជាក់ថា យោងតាមអង្គការ Alzheimer's Disease International ជំងឺ Alzheimer's គឺជាប្រភេទជំងឺរង្វេងស្មារតីដែល​សម្បូរជាងគេ ដោយវាប៉ះពាល់ដល់មនុស្សជាង ៥៥លាននាក់នៅទូទាំងសកលលោក ហើយតួលេខនេះត្រូវគេរំពឹងថា នឹងកើនទ្វេដងរៀងរាល់រយៈពេល២០ឆ្នាំ៕