(ប៉េកាំង)៖ កីឡាអាស៊ីលើកទី១៩រៀបចំនៅហាងចូវ ជាទីក្រុងដែលមានទេសភាពស្អាតបំផុតក្នុងប្រទេសចិន ហើយក៏ជាទីក្រុងដែលពោរពេញដោយសួនឧទ្យាន ប្រាសាទ និងបឹងភាពស្រស់ស្អាតដោយផ្សារភ្ជាប់នឹងសុភាសិតចិនបុរាណមួយពោលថា «នៅលើមេឃមានឋានសួគ៌ ហើយនៅលើផែនដីមានក្រុងស៊ូចូវ និងក្រុងហាងចូវ» ដែលនេះរំលេចកាន់តែច្បាស់ថា ការរៀបចំកីឡាអាស៊ីលើកទី១៩ បានផ្សារភ្ជាប់យ៉ាងមុតមាំជាមួយនឹងបរិស្ថានបៃតងភាពនៃអរិយធម៌អេកូឡូស៊ី។ ទស្សនៈទឹកថ្លា ភ្នំបៃតង ជាភ្នំមាស ភ្នំប្រាក់បានផ្តល់សក្ខីកម្មយ៉ាងជាក់ច្បាស់នៅក្នុងក្រុងហាងចូវ ដែលគឺជាក្រុងរបស់ខេត្តចឺចាំង (Zhejiang)បាននិងកំពុងប្រកាន់ខ្ជាប់នូវកំណែទម្រង់និងការបើកទូលាយ ហើយបានពន្លឿនការអភិវឌ្ឍប្រកបដោយគុណភាពខ្ពស់ ហើយបាននិងកំពុងកសាងតំបន់គំរូភាពនៃវិបុលភាពរួម ដែលជាអ្នកត្រួសត្រាយក្នុងការធ្វើទំនើបកម្មតាមបែបផែនចិន ដោយបង្ហាញយ៉ាងប្រត្យក្សពីប្រទេសចិនដ៏ស្រស់ស្អាត។
កីឡាអាស៊ីលើកទី១៩នៅហាងចូវដោយមានប្រតិភូ និងអត្តពលិកមកពី៤៥ប្រទេសចូលរួមបានផ្តល់កម្លាំងកាន់តែខ្លាំងដល់ «កិច្ចកសាងសហគមន៍រួមជីវិត» ដែលនេះគឺជាហ្សែនរបស់ជនជាតិចិន ដែលមានអាយុកាលរាប់ពាន់ឆ្នាំមកហើយ ស្របនឹងទស្សនៈរបស់ឡៅជឺដែលជាស្ថាបនិកលទ្ធិតាវ ដែលកាលពី២៧០០ឆ្នាំមុន បានលើកឡើងថា តាវប្រតិបត្តិតាមធម្មជាតិ ដែលមានន័យថា ដំណើរនៃអ្វីគ្រប់យ៉ាងត្រូវគោរពតាមក្រឹត្យក្រមធម្មជាតិ។ មនុស្សនិងធម្មជាតិគឺជាតួអង្គរួមដែលមិនអាចបំបែកបាន។ បុព្វបុរសចិនបានសង្ខេបនូវស្មារតីនៃការរួមបញ្ចូលគ្នាទៅវិញទៅមកដោយបានចែងថា អ្វីៗទាំងអស់កើតចេញមកជាមួយគ្នា ដោយមិនបំផ្លាញគ្នាទៅវិញទៅមក ហើយតាវដើរស្របគ្នាមិនប៉ះទង្គិចគ្នា។ ច្បាស់ណាស់ថា កីឡាអាស៊ីលើកទី១៩គឺជាពេលវេលា ដែលប្រជាជាតិអាស៊ីមិនអាចបំភ្លេចបាន ហើយព្រឹត្តិការណ៍កីឡាអាស៊ីលើកទី១៩នេះនឹងបន្សល់ទុក នូវការចងចាំដ៏ល្អបំផុតនៃអរិយធម៌អេកូឡូស៊ី អំពីការប្រកួតកីឡាអាស៊ី។
កីឡាអាស៊ីលើកទី១៩នៅហាងចូវគឺជាការប្តេជ្ញាចិត្តបន្ថែមទៀតរបស់ប្រទេសចិនចំពោះភាពចម្រុះនៃវប្បធម៌ និងទម្រង់ជីវិតដ៏អស្ចារ្យនៃមនុស្សជាតិទាំងអស់ ប្រៀបដូចជាគ្រួសារមនុស្សតែមួយ និងសហគមន៍ផែនដីតែមួយដែលមានវាសនារួមគ្នា។ ការសម្តែងសិល្បៈដោយមានការចូលរួម ពីប្រព័ន្ធបច្ចេកវិទ្យាទំនើបនាយុគសម័យថ្មី របស់ប្រទេសចិនគឺជាសុឆន្ទៈឥតងាករេ របស់ប្រជាជាតចិន ក្នុងការបន្តរួមគ្នាជាមួយបណ្តាប្រទេសទាំងអស់នាំមក នូវសង្គមសកលប្រកបដោយនិរន្តរភាពដែលបង្កើតឡើង ដោយការគោរពធម្មជាតិ សិទ្ធិមនុស្សជាសកល យុត្តិធម៌សេដ្ឋកិច្ច និងវប្បធម៌សន្តិភាព ។ នេះជាឆន្ទៈរបស់ប្រជាជាតិចិនរួមជាមួយ មនុស្សជាតិ នៅលើផែនដីត្រូវប្រកាសពីការទទួលខុសត្រូវដ៏ធំជាងមុន ចំពោះសហគមន៍រួមជីវិតដែលមានលក្ខណៈសុខដុមនីយកម្ម រវាងមនុស្សនិងធម្មជាតិផ្តល់ជូនចំពោះមនុស្សជាតិជំនាន់ក្រោយៗ។
កីឡាអាស៊ីលើកទី១៩នៅហាងចូវបានរំលេចបន្ថែមនូវឫទ្ធានុភាពនៃវិស័យបច្ចេកវិទ្យារបស់ប្រទេសចិន ដែលជាពិសេសភ្លើងជ័យនៃកីឡាអាស៊ីលើកទី១៩ យកពីវិកិណ្ណដ្ឋានដែលបានរត់បណ្តាក់ក្នុងខេត្ត ចឺចាំង(Zhejiang)ពីថ្ងៃទី៨ ខែកញ្ញា ឆ្នាំ២០២៣ ដោយនៅលើបណ្តាញអ៊ឺនធើណេតចំនួនអ្នកចូលរួម រត់បណ្តាក់ភ្លើងគប់ឌីជីថលបានលើសពី ១០០ លាននាក់ ហើយដោយឡែកនៅយប់ថ្ងៃទី២៣ ខែកញ្ញា ឆ្នាំ២០២៣ អ្នកដឹកនាំនៃពិធីសម្ពោធបើកបានថ្លែងថា ដើម្បីធ្វើឱ្យមនុស្សកាន់តែច្រើនចូលរួម ក្នុងពិធីដុតបំភ្លឺភ្លើងគប់ធំ ក្រុមការងារបានច្នៃប្រឌិតរបៀបដុតបំភ្លឺភ្លើងគប់ធំឌីជីថល សម្រាប់មនុស្សកាន់តែច្រើនអាចចូលរួមដុតបំភ្លឺភ្លើងគប់ធំ ដែលបានផ្តល់ចំនួនមនុស្សចូលរួមដុតបំភ្លឺភ្លើងគប់ធំឌីជីថលបានលើសពី ១០៥លាននាក់។
កីឡាអាស៊ីលើកទី១៩នៅហាងចូវដែលមានកីឡាករកីឡាការិនីអាស៊ីចំនួនជាង១.២ម៉ឺននាក់នឹងនឹងបង្ហាញសមត្ថភាពរៀងៗខ្លួនដើម្បីចូលរួមប្រកួតប្រជែង គឺជាប្រភពដ៏សំខាន់នៃសាមគ្គីភាព ការចែករំលែក និងគុណតម្លៃនៃការរួមកម្លាំងគ្នាក្នុងបុព្វហេតុ នៃកិច្ចកសាងសហគមន៍វាសនារួមនៃមនុស្សជាតិ ស្របនឹងទស្សនៈរបស់លោក Xi Jinping ដែលបានលើកឡើងថា «យើងគួរតែប្រើកីឡា ដើម្បីជំរុញបរិយាប័ន្ន បង្កើនជំនឿចិត្តខាងអរិយធម៌ ប្រកាន់ខ្ជាប់នូវការផ្លាស់ប្តូរនិងការរៀនសូត្រពីគ្នាទៅវិញទៅមក ដើម្បីបន្តសរសេរនូវទំព័រវិបុលភាពថ្មីនៃអរិយធម៌អាស៊ី។»
ជារួម កីឡាអាស៊ីលើកទី១៩នៅហាងចូវដែលប្រទេសចិន បានធ្វើជាម្ចាស់ផ្ទះគឺជាមោទកភាពនៃដំណើរឈានឆ្ពោះទៅកាន់ តែស្វាហាប់នៃអរិយធម៌អេកូឡូស៊ី និងកិច្ចកសាងសហគមន៍ជោគវាសនារួមនៃមនុស្សជាតិ ក្រោមទម្រសន្តិភាពនិងការអភិវឌ្ឍសម្រាប់មនុស្សជាតិទាំងមូល។ ព្រឹត្តិការណ៍កីឡាអាស៊ីលើកទី១៩រំលេចពីចរន្ត នៃទ្វីបអាស៊ីបានប្រើប្រាស់យ៉ាងល្អឥតខ្ចោះនូវបច្ចេកវិទ្យាទំនើប ដើម្បីបង្ហាញពីភាពទាក់ទាញដ៏វិសេសវិសាល នៃវិចិត្រសាស្រ្តអរិយធម៌បូព៌ាប្រទេស ដើម្បីបង្ហាញពីការរួមបញ្ចូលគ្នាខាងវប្បធម៌រវាងចិននិងអាស៊ី រវាងចិននិងពិភពលោកក្នុងយុគសម័យថ្មី៕
ដោយបណ្ឌិត ជា មុនីឫទ្ធិប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន
