(ស្តុកខុល)៖ ប៉ូលិសបានឲ្យដឹងនៅថ្ងៃសៅរ៍នេះថា ផ្លូវហាយវ៉េ (Highway) នៅឯភាគនិរតីនៃប្រទេសស៊ុយអែត បានបាក់ស្រុតដោយសារបំណាក់ដីបណ្តាលឲ្យមនុស្ស ៣រងរបួសស្រាល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសៅរ៍ ទី២៣ ខែកញ្ញា ឆ្នាំ២០២៣។
ផ្លូវវេហាយវ៉េនេះតភ្ជាប់រវាងទីក្រុងធំទីពីររបស់ស៊ុយអែត គឺហ្គោធិនបឺគ (Gothenburg) និងរដ្ឋធានីអូស្លូ (Oslo) របស់ប្រទេសន័រវេស ហើយចំណុចរងគ្រោះស្ថិតនៅចម្ងាយប្រហែល ៥០គីឡូម៉ែត្រភាគខាងជើងទីក្រុង Gothenburg លើឆ្នេរខាងលិចរបស់ស៊ុយអែត។
ភ្នាក់ងារជួយសង្គ្រោះក្នុងទីក្រុង Gothenburg បាននិយាយថា ការបាក់ស្រុតនោះប៉ះពាល់ដល់យានជំនិះប្រហែល ១០គ្រឿង ទីតាំងស្តុកឈើ កន្លែងអាជីវកម្មដែលមានស្ថានីយ៍ប្រេងឥន្ធនៈ និងភោជនីយដ្ឋាន។ រថយន្តជាច្រើនគ្រឿង និងរថយន្តដឹកទំនិញមួយគ្រឿង បានធ្លាក់ចូលក្នុងប្រហោងដីដែលប្រេះ។
គួរបញ្ជាក់ថា បុគ្គលិកសង្រ្គោះដែលបានទទួលការបណ្តុះបណ្តាលពិសេស និងសត្វសុនខ កំពុងស្វែងរកមនុស្សក្នុងតំបន់រងគ្រោះ ខណៈការបាក់ដីបន្ថែមទៀតនៅមិនទាន់អាចកំណត់បាននោះទេ៕
រូបភាពពី AP