(ប៉េកាំង)៖ ប្រព័ន្ធផ្សព្វផ្សាយរដ្ឋចិន បានរាយការណ៍នៅថ្ងៃពុធនេះថា ក្រុមមន្រ្តីឧតុនិយមចិន បានបង្កើនការព្រមានអំពីភ្លៀងធ្លាក់ និងខ្យល់បក់​ខ្លាំងនៅតាមតំបន់មួយចំនួន ក្រោយព្យុះថូណាដូដ៏អាក្រក់មួយ ទើបតែបានបង្កការបំផ្លិចបំផ្លាញនៅខេត្តជាំងស៊ូ (Jiangsu) ភាគខាងកើត ហើយផ្តាច់ជីវិតមនុស្ស៥នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី៩ ខែកញ្ញា ឆ្នាំ២០២៣។

ឧប្បត្តិហេតុខ្យល់ព្យុះខាងលើ ដែលកើតឡើងស្របពេលដែលប្រទេសចិន បានជួបប្រទះបាតុភូតអាកាសធាតុ ដែលបានបង្កការបំផ្លិចបំផ្លាញ និងសម្លាប់មនុស្សជាបន្តបន្ទាប់ ក្នុងរយៈពេលប៉ុន្មានខែចុងក្រោយនេះ បានជំរុញឱ្យអាជ្ញាធរចិនអំពាវនាវឱ្យប្រជាជនបង្កើនការប្រុងប្រយ័តខ្ពស់ ចំពោះការធ្លាក់ភ្លៀងនិងខ្យល់បោកបក់ខ្លាំង នៅតាមតំបន់ជាប់បណ្តោយឆ្នេរនៃខេត្ត Jiangsu ដែលនៅក្បែរសមុទ្រលឿង។

ព្យុះថូណាដូកាលពីថ្ងៃអង្គារសប្តាហ៍នេះ មានរយៈពេលខ្លីប៉ុន្តែមានកម្លាំងធ្ងន់ធ្ងរ។ ប្រព័ន្ធផ្សព្វផ្សាយចិន CCTV បាននិយាយថា ក្រៅពី​មនុស្សស្លាប់៥នាក់ គឺមាន៤នាក់ទៀតរងរបួស នៅពេលដែលខ្យល់ព្យុះនោះ បានវាយប្រហារភ្លាមៗលើ តំបន់ដែលមានមនុស្សរស់នៅច្រើន​មួយកន្លែង កាលពីវេលាល្ងាចថ្ងៃអង្គារ។ មិនតែប៉ុណ្ណោះ ផ្ទះសម្បែងប្រហែល ១,៨០០ខ្នង បានរងការបំផ្លិចបំផ្លាញ និងផ្ទៃដីដំណាំជាច្រើន​ហិកតា បានខូចខាត។

គួរបញ្ជាក់ថា ការព្រមានអាកាសធាតុក៏ត្រូវបានធ្វើឡើងផងដែរ សម្រាប់ទីក្រុងចុងឈីង (Chongqing) ព្រមទាំងខេត្តគួយចូវ (Guizhou), ហ៊ូណាន (Hunan), អានហ៊ុយ (Anhui) និងហ៊ូប៉ី (Hubei)។ នាពេលថ្មីៗកន្លងទៅនេះ ភ្លៀងធ្លាក់ខ្លាំងទើបតែ​វាយប្រហារលើតំបន់ភាគអាគ្នេយ៍នៃប្រទេសចិន ដែលបានបង្កឱ្យមានការជម្លៀសប្រជាជនទ្រង់ទ្រាយធំ គ្រោះបំណាក់ដី មនុស្សស្លាប់ ដោយសារតែចំហាយសេសសល់នៃព្យុះទីហ្វុង ហាយគួយ (Haikui)៕