(ហ្សាការតា)៖ យោធាមកពីបណ្តាប្រទេសជាសមាជិកអាស៊ាន នៅថ្ងៃអង្គារនេះ បានចាប់ផ្តើមការធ្វើសមយុទ្ធរួមដំបូងបំផុតនៅឥណ្ឌូណេស៉ី ខណៈវាគឺជាសមយុទ្ធលើកទីមួយហើយ ដែលធ្វើឡើងតែក្នុងចំណោមប្រទេសអាស៊ានសុទ្ធសាធ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៩ ខែកញ្ញា ឆ្នាំ២០២៣។

ក្រុមប្រទេសអាស៊ានកន្លងមក គឺធ្លាប់ចូលរួមសមយុទ្ធការពារជាតិលក្ខណៈពហុប្រទេស ប៉ុន្តែពួកវាបានប្រព្រឹត្តទៅជាមួយភាគីជាដៃគូខាងក្រៅ ស្របពេលដែលសមយុទ្ធខាងលើ គឺធ្វើឡើងក្រោមការចូលរួមពីសំណាក់ប្រទេសដែលជាសមាជិកតែប៉ុណ្ណោះ។ សមយុទ្ធនេះទៀតសោត នឹងផ្តោតលើ​លំហាត់មិនរួមមានការប្រយុទ្ធឡើយ ដោយកងកម្លាំងយោធា នឹងហ្វឹកហាត់លើផ្នែកផ្សេងៗ ដូចជាការជួយផ្នែកមនុស្សធម៌ ការជួយសង្រ្គោះគ្រោះមហន្តរាយ ប្រតិបត្តិការរុករកនិងសង្រ្គោះ ព្រមទាំងប្រតិបត្តិល្បាតរួមគ្នាតាមដែនសមុទ្រ ជាដើម។

ប្រមុខយោធាឥណ្ឌូណេស៉ី លោក ម៉ាហ្គោណូ យូដូ (Margono Yudo) បានប្រាប់ក្រុមអ្នកសារព័ត៌មាន ក្រោយពិធីបើកសមយុទ្ធនៅលើ​កោះ បាតាម (Batam) យ៉ាងដូច្នេះថា «តាមរយៈការរួមសាមគ្គីគ្នា ពួកយើងនឹងអាចរក្សាស្ថិរភាពនៅក្នុងតំបន់»។ លោក Yudo បានបន្ថែមទៀតថា កងកម្លាំង​មកពីប្រទេសអាស៊ានទាំងអស់ រួមទាំងមីយ៉ាន់ម៉ាផងដែរ កំពុងចូលរួមក្នុងសមយុទ្ធ «សាមគ្គីភាពអាស៊ាន» ដែលមានរយៈពេល៥ថ្ងៃនេះ។ បើតាមប្រភពពីមន្រ្តីយោធាឥណ្ឌូណេស៉ីមួយរូបឱ្យដឹងថា វត្តមានរបស់មីយ៉ាន់ម៉ាក្នុងសមយុទ្ធនេះ គឺត្រឹមក្នុងនាមជាអ្នកសង្កេតការណ៍។

គួរបញ្ជាក់ថា ថ្នាក់ដឹកនាំនៃរបបសឹកនៅមីយ៉ាន់ម៉ា ត្រូវបានហាមឃាត់មិនឱ្យចូលរួមកិច្ចប្រជុំអាស៊ានឡើយ ដោយសារតែវិបត្តិរដ្ឋប្រហារយោធា ឆ្នាំ២០២១។ ដោយឡែក សមយុទ្ធរួមខាងលើរបស់អាស៊ាន គឺប្រារព្ធឡើងនៅតំបន់សមុទ្រណាទូណាខាងត្បូង (South Natuna)៕