(សេអ៊ូល)៖ នាថ្ងៃចន្ទនេះ មេដឹកនាំគណបក្សប្រឆាំងធំជាងគេនៅប្រទេសកូរ៉េខាងត្បូង ត្រូវបានដឹកទៅកាន់មន្ទីរពេទ្យ បន្ទាប់ពីរូបលោក​បានធ្វើកូដកម្មបង្អត់អាហារខ្លួនឯង អស់រយៈពេលជាច្រើនថ្ងៃ ដើម្បីប្រឆាំងតវ៉ានឹងគោលនយោបាយរបស់រដ្ឋាភិបាល ហើយទន្ទឹមគ្នានេះដែរ ក្រុមរដ្ឋអាជ្ញាកូរ៉េខាងត្បូង ក៏កំពុងព្យាយាមចង់ឱ្យមានដីកាចាប់ខ្លួនរូបលោក ថែមទៀតផង ជុំវិញការសង្ស័យប្រព្រឹត្តអំពើពុករលួយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី១៨ ខែកញ្ញា ឆ្នាំ២០២៣។

លោក លី ជែម្យុង (Lee Jae Myung) ប្រធានគណបក្សប្រជាធិបតេយ្យកូរ៉េ បានចាប់ផ្តើមការធ្វើកូដកម្មបង្អត់អាហារកាលពីថ្ងៃទី៣១ ខែសីហា ដើម្បីសម្តែងការតវ៉ាចំពោះរដ្ឋាភិបាលកូរ៉េខាងត្បូង ជុំវិញការដោះស្រាយបញ្ហាសេដ្ឋកិច្ច ការគំរាមកំហែងចំពោះសេរីភាពសារព័ត៌មាន និង​ភាពអសកម្មក្នុងការឆ្លើយតប ចំពោះការបង្ហូរទឹកកាកសំណល់វិទ្យុសកម្មរបស់ជប៉ុន ចេញពីរោងចក្រថាមពលនុយក្លេអ៊ែរ Fukushima ចូលទៅមហាសមុទ្រប៉ាស៉ីហ្វិក ក្នុងចំណោមរឿងផ្សេងៗទៀត។ លោក គីម ហ្គីហុន (Kim Gi Hyeon) ដែលជាប្រធានបក្សកាន់អំណាច បានទទូចឱ្យលោក លី បញ្ឈប់កូដកម្មបង្អត់អាហារនោះ ដោយនិយាយថា លោកត្រៀមខ្លួនជានិច្ចដើម្បីពិភាក្សាគ្នា អំពីបញ្ហាគោលនយោបាយ។

ដោយឡែកនៅប៉ុន្មានម៉ោង ក្រោយលោក លី ត្រូវបានបញ្ជូនទៅកាន់មន្ទីរពេទ្យ ក្រុមរដ្ឋអាជ្ញាកូរ៉េខាងត្បូង បាននិយាយថា ពួកគេបានស្នើ​ឱ្យមានការចេញដីកាចាប់ខ្លួនរូបលោក ក្រោមក្របខណ្ឌនៃការស៉ើបអង្កេតសំណុំរឿងពុករលួយ។ លោក លី បានរងការចោទប្រកាន់ថា បានបំពានភារកិច្ច ជុំវិញការធ្វើឱ្យខាតបង់ថវិការដ្ឋប្រមាណ២០ពាន់លានវ៉ុន (១៥លានដុល្លារ) ពាក់ព័ន្ធគម្រោងអភិវឌ្ឍន៍មួយ អំលុងពេល​លោកនៅកាន់តំណែងជាចៅហ្វាយក្រុងសឹងណាម (Seongnam)។ ក្រុមរដ្ឋអាជ្ញាក៏បានចោទលោក លី អំពីការស៉ីសំណូកពាក់ព័ន្ធនឹង​ក្រុមហ៊ុនមួយ ដែលជាប់សង្ស័យក្នុងការផ្ទេរថវិកាដោយខុសច្បាប់៨លានដុល្លារ​ ទៅកាន់កូរ៉េខាងជើងផងដែរ។ មេដឹកនាំបក្សប្រឆាំងរូបនេះ បានអះអាងថា ខ្លួនមិនបានប្រព្រឹត្តខុសអ្វីឡើយ ហើយហៅការចោទប្រកាន់ទាំងនោះថា ជារឿងប្រឌិតនិងមានចេតនានយោបាយ។

គួរបញ្ជាក់ថា សភាកូរ៉េខាងត្បូងធ្លាប់បាន​បដិសេធសំណើកន្លងមករបស់ក្រុមរដ្ឋអាជ្ញា កាលពីខែកុម្ភៈ ឆ្នាំនេះ ដែលចង់ឱ្យមានដីកាចាប់ខ្លួនលោក។ លោក លី ជែម្យុង បានទទួលបរាជ័យក្រោមថ្វីដៃប្រធានាធិបតី លោក យូន ស៊ុកយុល ដែលជាអតីតអគ្គរដ្ឋអាជ្ញា នៅក្នុងការបោះឆ្នោតជ្រើសរើស​ប្រធានាធិបតីកូរ៉េខាងត្បូង កាលពីឆ្នាំ២០២២ ក្នុងសំឡេងត្រឹមតែ០.៧ភាគរយប៉ុណ្ណោះ៕