(បាងកក)៖ នៅថ្ងៃសុក្រនេះ លោក ភីថា លឹមចារឿនរ៉ាត់ (Pita Limjaroenrat) ដែលគណបក្ស Move Forward របស់លោក ឈ្នះបានអាសនៈច្រើនជាងគេ នៅក្នុងការបោះឆ្នោតសកលថៃកាលពីខែឧសភា បានសម្រេចលាលែងពីតំណែងជាប្រធានគណបក្សនេះ​ហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី១៥ ខែកញ្ញា ឆ្នាំ២០២៣។

លោក Pita Limjaroenrat បានដឹកនាំគណបក្ស Move Forward ទទួលបានជោគជ័យយ៉ាងភ្ញាក់ផ្អើល ប៉ុន្តែលោកត្រូវបានរារាំង​មិនឱ្យអាចក្លាយជានាយករដ្ឋមន្រ្តី ក្នុងការបោះឆ្នោតនៅសភា ដ្បិតសមាជិករដ្ឋសភានិងព្រឹទ្ធសភាថៃ ភាគច្រើនប្រកាន់ជំហរប្រឆាំងយ៉ាងដាច់អហង្ការ ចំពោះគោលនយោបាយ​កំណែទម្រង់របស់គណបក្សលោក ជាពិសេសពាក់ព័ន្ធការចង់ធ្វើវិសោធនកម្មច្បាប់ស្តីពីការប្រមាថព្រះមហាក្សត្រថៃ ហើយលោកក៏ត្រូវ​បានព្យួរសមាជិកភាពសភា ផងដែរ។

ក្រោយដឹងខ្លួនថាមិនអាចបង្កើតរដ្ឋាភិបាលបាន គណបក្ស Move Forward បានសម្រេចដើរចេញពីភាពជាដៃគូជាមួយគណបក្ស ភឿថៃ (Pheu Thai) ដែលបានងាកទៅចាប់ដៃជាមួយ ក្រុមគណបក្សគាំទ្រយោធានិងអភិរក្សនិយមវិញ ដើម្បីព្យាយាមបង្កើតរដ្ឋាភិបាល ដ្បិត Pheu Thai ជាបក្សឈ្នះបានអាសនៈច្រើនជាងគេទី២ ក្នុងការបោះឆ្នោតសកលបន្ទាប់ពី Move Forward។ បក្ស Move Forward បាននិយាយថា ខ្លួននឹងទៅ​ធ្វើជាបក្សប្រឆាំង ស្របពេលដែល Pheu Thai បង្កើតរដ្ឋាភិបាលបានជោគជ័យ ក្នុងទម្រង់ជារដ្ឋាភិបាលចម្រុះមាន១១គណបក្ស និង​មានបេក្ខជនរបស់ខ្លួនគឺលោក ស្រេតថា ថាវីស៉ីន (Srettha Thavisin) ជានាយករដ្ឋមន្រ្តីថៃថ្មី។

គួរបញ្ជាក់ថា នៅក្រោមច្បាប់បច្ចុប្បន្ន មេដឹកនាំក្រុមប្រឆាំង ចាំបាច់ត្រូវតែជាសមាជិកសភា។ ដូច្នេះហើយ លោក Pita បានប្រកាសនៅ​លើបណ្តាញសង្គម Facebook យ៉ាងដូច្នេះថា «ខ្ញុំបានលាលែងពីតួនាទីជាមេដឹកនាំនៃគណបក្ស Move Forward ហើយ ដើម្បីបើក​ផ្លូវឱ្យសមាជិកសភាដែលនៅអាចមានសំឡេងក្នុងសភា ធ្វើជាមេដឹកនាំក្រុមប្រឆាំង។ ដោយសារតែការព្យួរសមាជិកភាពសភារបស់ខ្ញុំ ខ្ញុំមិនអាចធ្វើជាមេដឹកនាំក្រុមប្រឆាំងបាននោះទេ»។ យ៉ាងណាមិញ លោក Pita បានអះអាងថា រូបលោកនឹងនៅតែបន្តចូលរួមជិតស្និទ្ធ​ក្នុងគណបក្ស Move Forward ដដែល៕