(សេអ៊ូល)៖ យោធាកូរ៉េខាងត្បូង បានឱ្យដឹងថាកូរ៉េខាងជើងនៅថ្ងៃពុធ ទី១៣ ខែកញ្ញានេះបានបាញ់សាកល្បងមីស៊ីលបាលិស្ទីគមួយគ្រាប់ ខណៈ លោក គីម ជុងអ៊ុន កំពុងស្ថិតនៅក្នុងប្រទេសរុស្ស៉ី ដើម្បីជួបជាមួយលោក វ្ល៉ាឌីមៀ ពូទីន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP​។

នៅក្នុងសេចក្ដីថ្លែងការណ៍មួយ នាយសេនាធិការចម្រុះកងទ័ពកូរ៉េខាងត្បូង បានគូសបញ្ជាក់ដូច្នេះថា «កូរ៉េខាងជើងបានបាញ់មីស៊ីលបាលិស្ទីគ មិនទាន់ស្គាល់ម៉ាកមួយគ្រាប់ ឆ្ពោះទៅកាន់សមុទ្រខាងកើត»។

គួរបញ្ជាក់ថា លោក គីម ជុងអ៊ុន បានធ្វើដំណើរតាមរថភ្លើងពាសដែកទៅដល់រុស្ស៉ីកាលពីថ្ងៃអង្គារ ដើម្បីចូលរួមក្នុងកិច្ចពិភាក្សាជាមួយលោក ប្រធានាធិបតីរុស្ស៉ី វ្ល៉ាឌីមៀ ពូទីន។ មេដឹកនាំកូរ៉េខាងជើងរូបនេះក៏បាននិយាយដែរថាដំណើរទស្សនកិច្ចរបស់លោកនៅប្រទេសរុស្ស៉ី បានបង្ហាញ យ៉ាងច្បាស់ពី «សារៈសំខាន់យុទ្ធសាស្ត្រ» នៃទំនាក់ទំនងរវាងប្រទេសទាំង២។

លោក គីម ជុងអ៊ុន បានធ្វើដំណើរទៅកាន់ប្រទេសរុស្ស៉ី អមដំណើរដោយមន្ត្រីយោធាកំពូលៗកូរ៉េខាងជើង ក្នុងនោះរួមមាន មេបញ្ជាការកងទ័ពប្រជាជនកូរ៉េ លោក ផាក ជុង ជុន (Pak Jong Chon) និងប្រធាននាយកដ្ឋានឧស្សាហកម្ម លោក ចូ ឈុន យ៉ុង (Jo Chun Ryong) ដែលនេះត្រូវបានក្រុមអ្នកវិភាគជឿជាក់ថាកិច្ចពិភាក្សារវាងលោក គីម និងលោក ពូទីន នឹងសង្កត់ធ្ងន់លើ កិច្ចព្រមព្រៀងអាវុធ៕