(គូឡាឡាំពួ)៖ នៅថ្ងៃចន្ទនេះ នាយករដ្ឋមន្រ្តីម៉ាឡេស៉ី លោក អាន់វ៉ា អ៉ីប្រាហ៉ីម (Anwar Ibrahim) បាននិយាយថា ប្រទេសរបស់លោក កំពុងកំណត់គោលដៅសម្រេចឱ្យបាន កំណើនសេដ្ឋកិច្ចយ៉ាងហោច៥ភាគរយជារៀងរាល់ឆ្នាំ រហូតដល់ឆ្នាំ២០២៥ ខណៈវាទាប​ជាងគោលដៅកំណើនសេដ្ឋកិច្ច ដែលប្រទេសអាស៊ានមួយនេះ បានកំណត់ពីមុនមក។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP នៅថ្ងៃចន្ទ ទី១១ ខែកញ្ញា ឆ្នាំ២០២៣។

លោក អាន់វ៉ា បានលើកឡើងថា កំណើនសេដ្ឋកិច្ចនៃប្រទេសម៉ាឡេស៉ី នឹងត្រូវគាំទ្រដោយការផ្តោតសំខាន់ ទៅលើការពន្លឿនការធ្វើអន្តរកាល ឆ្ពោះទៅរកឧស្សាហកម្មដែលមានតម្លៃខ្ពស់ និងការវិនិយោគធំៗជាងមុន ហើយលោកបន្តថា ម៉ាឡេស៉ីមានគោលដៅទាក់ទាញការវិនិយោគ​ឯកជន ឱ្យដល់៦៤.១៧ពាន់លានដុល្លារជាប្រចាំឆ្នាំ រហូតដល់ឆ្នាំ២០២៥។

លោកនាយករដ្ឋមន្រ្តីម៉ាឡេស៉ី បាននិយាយថា «រដ្ឋាភិបាលនឹងធ្វើឱ្យម៉ាឡេស៉ីក្លាយជាគោលដៅដ៏លេចធ្លោជាងគេមួយ សម្រាប់វិនិយោគិនតាមរយៈការពង្រឹងភាពប្រកួតប្រជែង»។ លោក អាន់វ៉ា ក៏បានបន្ថែមផងដែរថា រដ្ឋាភិបាលម៉ាឡេស៉ីនឹងបង្កើនការបែងចែកថវិកា សម្រាប់​ផែនការសេដ្ឋកិច្ចឱ្យដល់៨៨.៧៧ពាន់លានដុល្លារ ធៀបនឹង៨៨.៥២ពាន់លានដុល្លារ ដែលត្រូវបានប្រកាសកន្លងមក។

គួរបញ្ជាក់ថា ការព្យាករកំណើនសេដ្ឋកិច្ចទាបជាងមុននេះ គឺស្របពេលដែលសេដ្ឋកិច្ចប្រទេសម៉ាឡេស៉ី ទទួលរងផលប៉ះពាល់ពីឥទ្ធិពលនៃការអន់ថយល្បឿន របស់សេដ្ឋកិច្ចពិភពលោក។ កំណើនមានភាពយឺតយ៉ាវបំផុតក្នុងរយៈពេលជិត២ឆ្នាំ កាលពីត្រីមាសទី២ នៃឆ្នាំនេះ ខណៈការនាំចេញមានការធ្លាក់ចុះ។ កន្លងមកនេះ ម៉ាឡេស៉ីធ្លាប់បានកំណត់គោលដៅកំណើនសេដ្ឋកិច្ចចន្លោះ ៤.៥-៥.៥ភាគរយជាប្រចាំឆ្នាំ សម្រាប់ចន្លោះឆ្នាំ២០២១-២០២៥ នៅក្នុងផ្នែកនៃផែនការកំណើនសេដ្ឋកិច្ច រយៈពេល៥ឆ្នាំរបស់ខ្លួន៕