(ប៉េកាំង)៖ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ (Nicolas Maduro) កំពុងព្យាយាមស្វែងរកការគាំទ្រពីប្រទេសចិន ដើម្បីចូលរួមក្នុងក្រុមប្រទេស BRICS ដែលទើបសម្រេចពង្រីកសមាជិកបន្ថែមថ្មីៗនេះ ស្របពេលដែលរូបលោកកំពុងបំពេញទស្សនកិច្ច​នៅចិន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី១០ ខែកញ្ញា ឆ្នាំ២០២៣។

ថ្លែងប្រាប់ទីភ្នាក់ងារព័ត៌មានចិន ស៉ីនហួរ កាលពីថ្ងៃសៅរ៍សប្តាហ៍នេះ លោក Maduro បាននិយាយថា លោកមានគោលដៅចង់ធានា​ឱ្យបាន នូវការចូលរួមជាសមាជិក BRICS សម្រាប់ប្រទេសវេណេស៊ុយអេឡា ដោយមានការគាំទ្រពីចិនក៏ដូចជាពីសំណាក់ប្រទេសនានា ដែលជាសមាជិករួចស្រាប់។ លោក Maduro បានសង្កត់ធ្ងន់ថា ទីក្រុងប៉េកាំងអាចជួយសម្រេចគោលដៅនេះបាន។

លោកប្រធានាធិបតីវេណេស៊ុយអេឡា បានមកដល់ប្រទេសចិនកាលពីថ្ងៃសុក្រសប្តាហ៍នេះ ហើយត្រូវរំពឹងថានឹងបន្តស្នាក់នៅ រហូតដល់​ថ្ងៃព្រហស្បតិ៍សប្តាហ៍ក្រោយ ខណៈវាគឺជាដំណើរទស្សនកិច្ចផ្លូវរដ្ឋលើកដំបូងរបស់លោក មកកាន់មហាយក្សអាស៉ីមួយនេះ គិតចាប់តាំងពី​ឆ្នាំ២០១៨មក និងចំពេលដែលប្រធានាធិបតីចិន លោក ស៉ី ជិនពីង សម្រេចមិនទៅចូលរួមកិច្ចប្រជុំកំពូល G20 នាចុងសប្តាហ៍នេះ នៅប្រទេសឥណ្ឌា។

គួរបញ្ជាក់ថា ចិនមើលឃើញក្រុមប្រទេស BRICS គឺជាអង្គការថ្មីមួយ ដើម្បីប្រកួតប្រជែងជាមួយអង្គការអន្តរជាតិផ្សេងៗទៀត ដែលស្ថិតនៅក្រោម​ឥទ្ធិពលរបស់សហរដ្ឋអាមេរិក និងក្រុមប្រទេសលោកខាងលិច។ ប្លុក BRICS ដែលរួមមានប្រេស៉ីល រុស្ស៉ី ឥណ្ឌា ចិន និងអាហ្រ្វិកខាងត្បូង ទើបតែបានព្រមព្រៀងគ្នាក្នុងកិច្ចប្រជុំកំពូលប្រចាំឆ្នាំកាលពីខែសីហា ដើម្បីទទួលយកសមាជិកពេញសិទ្ធិថ្មីចំនួន៦ថែមទៀត ចាប់ពីថ្ងៃទី១ ខែមករា ឆ្នាំ២០២៤។ ប្រទេសទាំងនោះរួមមាន អាហ្សង់ទីន អេត្យូពី អ៉ីរ៉ង់ អារ៉ាប៊ីសាអូឌីត អេហ្ស៉ីប និងអេមីរ៉ាត់អារ៉ាប់រួម៕