(ឡុងដ៍)៖ ក្រសួងមហាផ្ទៃនៃចក្រភពអង់គ្លេស បាននិយាយនៅថ្ងៃពុធនេះថា ក្រុមទាហានស៉ីឈ្នួល Wagner Group របស់ប្រទេសរុស្ស៉ី នឹងត្រូវចាត់ថ្នាក់ជា អង្គការភេរវករដោយរដ្ឋាភិបាលអង់គ្លេស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី៦ ខែកញ្ញា ឆ្នាំ២០២៣។

ក្រសួងមហាផ្ទៃអង់គ្លេសបាននិយាយនៅក្នុងសេចក្តីថ្លែងការណ៍ថា សេចក្តីព្រាងបទបញ្ជាមួយ ដែលត្រូវដាក់ទៅកាន់សភា នឹងអនុញ្ញាតឱ្យ​ទ្រព្យសម្បត្តិទាំងអស់របស់ Wagner អាចត្រូវចាត់ថ្នាក់ជាទ្រព្យសម្បត្តិរបស់អង្គការភេរវករនិងរឹបអូសទុកបាន ហើយការចូលជា​សមាជិកឬការគាំទ្រក្រុមទាហានស៉ីឈ្នួលនេះ នឹងជារឿងខុសច្បាប់ ដែលប្រឈមការមានទោសជាប់ពន្ធនាគាររហូតដល់១៤ឆ្នាំ។ បទបញ្ជានោះ ត្រូវបានរំពឹងថា នឹងចូលជាធរមាននៅថ្ងៃទី១៣ ខែកញ្ញា។ ក្រោយពេលចូលជាធរមាន ការលើកកម្ពស់ផ្សព្វផ្សាយអំពីក្រុម Wagner ការជួយសម្របសម្រួលកិច្ចប្រជុំ និងការកាន់បង្ហាញនិមិត្តសញ្ញារបស់ក្រុមនេះ នៅតាមទីសាធារណៈ​ ក៏ត្រូវចាត់ទុកជាបទល្មើសព្រហ្មទណ្ឌ ផងដែរ។

ក្រុមទាហានស៉ីឈ្នួល Wagner បានធ្វើប្រតិបត្តិការនៅស៉ីរី លីប៊ី ក៏ដូចជាប្រទេសជាច្រើនទៀត នៅឯតំបន់ភាគខាងជើង​និងភាគខាងលិចទ្វីបអាហ្រ្វិក។ Wagner បានកែនអ្នកទោសរាប់ពាន់នាក់ចេញពីពន្ធនាគារនៅប្រទេសរុស្ស៉ី ដើម្បីយកទៅប្រយុទ្ធក្នុងសង្រ្គាម​នៅអ៊ុយក្រែន ដោយបានផ្តល់កងកម្លាំងវាយលុកចម្បង សម្រាប់ប្រតិបត្តិការអំលុងរដូវរងាឆ្នាំ២០២២-២០២៣ របស់រុស្ស៉ីនៅទីនោះ។

កាលពីខែមិថុនា ឆ្នាំនេះ Wagner បានធ្វើសកម្មភាពបះបោរប្រដាប់អាវុធរយៈពេលខ្លីមួយនៅរុស្ស៉ី ដែលត្រូវបានចាត់ទុកជា អំពើក្បត់ជាតិដោយប្រធានាធិបតីរុស្ស៉ី លោក វ៉្លាឌីមៀ ពូទីន ហើយកាលពីថ្ងៃទី២៣ ខែសីហាកន្លងទៅ ថៅកែក្រុមទាហានស៉ីឈ្នួលនេះ គឺលោក យេវហ្គេនី ព្រីហ្គោហ្ស៉ីន (Yevgeny Prigozhin) និងក្រុមមេបញ្ជាការជាន់ខ្ពស់របស់ Wagner បានបាត់បង់ជីវិត ក្នុងករណីធ្លាក់យន្តហោះ។

គួរបញ្ជាក់ថា ចក្រភពអង់គ្លេសបានដាក់ទណ្ឌកម្មកាលពីឆ្នាំ២០២០ ទៅលើលោក Prigozhin ហើយដាក់ទៅលើ​ក្រុម Wagner ទាំងមូលតែម្តង កាលពីខែមីនា ឆ្នាំ២០២២។ រីឯកាលពីខែកក្កដា ឆ្នាំនេះ ចក្រភពអង់គ្លេស ក៏បានដាក់ទណ្ឌកម្មទៅលើ​បុគ្គលនិងក្រុមហ៊ុននានា ដែលមានទំនាក់ទំនងជាមួយ Wagner នៅឯសាធារណរដ្ឋអាហ្រ្វិកកណ្តាល ម៉ាលី និងស៊ូដង់ ថែមទៀតផង៕