(ប៉ារីស)៖ នាយករដ្ឋមន្ត្រីបារាំង លោកស្រី Elisabeth Borne បានប្រាប់សារព័ត៌មានក្នុងស្រុកមួយ នៅថ្ងៃអាទិត្យ (ថ្ងៃទី៣ ខែកញ្ញា) នេះថា ប្រទេសបារាំងគ្រោងនឹងហាមឃាត់បារីអេឡិចត្រូនិក។ នេះបើយោងតាមការចេញផ្សាដោយ ទីភ្នាក់សារព័ត៌មាន AFP នៅថ្ងៃទី០៣ ខែកញ្ញា ឆ្នាំ២០២៣។

លោកស្រី Bourne បាននិយាយថា «វាជាបញ្ហាសុខភាពសាធារណៈដ៏សំខាន់» ដោយបន្ថែមថា រដ្ឋាភិបាលកំពុងរៀបចំផែនការសម្រាប់កម្មវិធីជាតិ ដើម្បីប្រយុទ្ធប្រឆាំងនឹងការប្រើប្រាស់ថ្នាំជក់ ដែលលោកស្រីបាននិយាយថា វាជាអ្នកទទួលខុសត្រូវចំពោះការស្លាប់ ៧៥,០០០ នាក់ក្នុងមួយឆ្នាំៗ នៅប្រទេសបារាំង។

លោកស្រី​បាន​បន្ថែម​ថា អ្វី​ដែល​គេ​ហៅ​ថា​ឧបករណ៍​ puff បង្កើត​ទម្លាប់​មិនល្អក្នុង​យុវវ័យ​បារាំង ដែល​អាច​នាំ​ឱ្យ​មាន​ការ​ញៀន​ថ្នាំ​ជក់។

ទោះជាយ៉ាងនេះក្តី នាយករដ្ឋមន្ត្រីបារាំងរូបនេះបាននិយាយថា រដ្ឋាភិបាលមិនមានគម្រោងដំឡើងពន្ធថ្នាំជក់នៅឆ្នាំក្រោយទេ បន្ទាប់ពីដំឡើងថ្លៃនៅឆ្នាំនេះរួច។

គួរបញ្ជាក់ថា ប្រធានាធិបតីបារាំង លោក Emmanuel Macron កាលពីឆ្នាំ ២០២១ កន្លងទៅ បានដាក់ចេញនូវផែនការមហិច្ឆិតា ក្នុងការដោះស្រាយបញ្ហាថ្នាំជក់ និងគ្រឿងស្រវឹង ព្រមទាំងមាន បំណងធ្វើឱ្យមនុស្សវ័យ ២០ឆ្នាំទាំងអស់គ្មានការជក់បារី ត្រឹមឆ្នាំ២០៣០៕