(ប៉េកាំង)៖ ក្រសួងការបរទេសចិន បានប្រកាសនៅថ្ងៃសុក្រនេះថា នាយករដ្ឋមន្រ្តីចិន លោក លី ឈាំង (Li Qiang) នឹងចូលរួមកិច្ចប្រជុំកំពូលអាស៊ាន ដែលត្រូវប្រារព្ធឡើងនៅថ្ងៃទី៥ ដល់ថ្ងៃទី៨ ខែកញ្ញា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី១ ខែកញ្ញា ឆ្នាំ២០២៣។

លោក វ៉ាង វិនពីន (Wang Wenbin) អ្នកនាំពាក្យក្រសួងការបរទេសចិន បាននិយាយយ៉ាងដូច្នេះថា «តបការអញ្ជើញពីសំណាក់​លោក ចូកូ វីដូដូ ប្រធានាធិបតីនៃប្រទេសឥណ្ឌូណេស៉ី ដែលបច្ចុប្បន្នជាប្រធានប្តូរវេនរបស់អាស៊ាន នាយករដ្ឋមន្រ្តីចិន លោក Li Qiang នឹងទៅចូលរួមកិច្ចប្រជុំកំពូលចិន-អាស៊ាន លើកទី២៦, កិច្ចប្រជុំកំពូលអាស៊ាន-បូកបី លើកទី២៦ និងកិច្ចប្រជុំកំពូលអាស៉ីខាងកើត លើកទី១៨ ដែលត្រូវប្រារព្ធឡើងនៅទីក្រុងហ្សាការតា ហើយបំពេញទស្សនកិច្ចផ្លូវការ នៅប្រទេសឥណ្ឌូណេស៉ី ចាប់ពីថ្ងៃទី៥ ដល់ថ្ងៃទី៨ ខែកញ្ញា»។

គួរបញ្ជាក់ថា សេចក្តីប្រកាសខាងលើធ្វើឡើង ចំពេលមានសេចក្តីរាយការណ៍ព័ត៌មានថា ប្រធានាធិបតីចិន លោក ស៉ី ជិនពីង ទំនងជានឹង​មិនបានចូលរួមកិច្ចប្រជុំកំពូល G20 ដែលត្រូវប្រារព្ធឡើង នៅទីក្រុងញូដេលីនៃប្រទេសឥណ្ឌាឡើយ ហើយលោក Li Qiang ត្រូវគេរំពឹងថា នឹងចូលរួមជំនួសដើម្បីតំណាងឱ្យទីក្រុងប៉េកាំង។ កិច្ចប្រជុំកំពូល G20 នឹងប្រព្រឹត្តទៅនៅថ្ងៃទី៩-១០ ខែកញ្ញា គឺភ្លាមៗបន្ទាប់ពីកិច្ចប្រជុំកំពូល​អាស៊ាននៅឥណ្ឌូណេស៉ី៕