(លីប្រឺវីល)៖ កាលពីថ្ងៃព្រហស្បតិ៍សប្តាហ៍នេះ សហភាពអាហ្រ្វិក (AU) បានសម្រេចផ្អាកសមាជិកភាពរបស់ប្រទេសហ្កាបុង គឺមួយថ្ងៃបន្ទាប់ពីការធ្វើរដ្ឋប្រហារយោធា ទម្លាក់ប្រធានាធិបតីលោក អាលី បុងហ្គោ (Ali Bongo) ហើយវាគឺជាចំណាត់ការដំបូងនៅក្នុងតំបន់ ចំពោះសកម្មភាពរដ្ឋប្រហារនេះ ដែលជា​​រដ្ឋប្រហារទី៨ នៅអាហ្រ្វិកកណ្តាលនិងអាហ្រ្វិកខាងលិច គិតចាប់តាំងពីឆ្នាំ២០២០មក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី១ ខែកញ្ញា ឆ្នាំ២០២៣។

រដ្ឋប្រហារយោធាខាងលើ បានបិទបញ្ចប់ការរក្សាអំណាចជិត ៦ទសវត្សរ៍នៃគ្រួសារត្រកូល Bongo នៅប្រទេសហ្កាបុង និងបង្កើតបញ្ហាថ្មីមួយទៀត សម្រាប់តំបន់អាហ្រ្វិក ដែលប៉ុន្មានឆ្នាំមកនេះបានមើលឃើញ នូវការកើតមានរដ្ឋប្រហារយោធាជាបន្តបន្ទាប់​ រហូតដល់ថ្នាក់ប្រធានាធិបតី​នៃប្រទេសនីហ្សេរីយ៉ា លោក បូឡា ធីនូប៊ូ (Bola Tinubu) ហៅថា «ជំងឺឆ្លងរាលដាលនៃរបបផ្តាច់ការ»។

ដូចទៅនឹងរបបសឹកដទៃទៀតដែរ ដែលបានដណ្តើមអំណាចនៅក្នុងតំបន់ នាពេលកន្លងមកនេះ គឺក្រុមមេដឹកនាំយោធានៅហ្កាបុង កំពុង​ព្យាយាមពង្រឹងអំណាចរបស់ខ្លួន បើទោះបីជាមានការរិះគន់ថ្កោលទោសពីអន្តរជាតិក៏ដោយ។ លោកឧត្តមសេនីយ៍ ប៊្រីស អូលីហ្គា ហ្កេម៉ា (Brice Oligui Nguema) ដែលជាមេដឹកនាំរដ្ឋប្រហារយោធា និងជាអតីតប្រមុខកងអង្គរក្សប្រធានាធិបតី ត្រូវគេរំពឹងថានឹងស្បថចូលកាន់តំណែងជា​ប្រធានាធិបតីហ្កាបុង នៅថ្ងៃចន្ទសប្តាហ៍ក្រោយ។

គួរបញ្ជាក់ថា ក្រុមប្រឹក្សាសន្តិសុខនិងសន្តិភាពរបស់ AU បានចាត់វិធានការឆ្លើយតបដំបូង កាលពីថ្ងៃព្រហស្បតិ៍ តាមរយៈការហាមឃាត់​មិនឱ្យហ្កាបុងចូលរួមក្នុងសកម្មភាពនានារបស់សហភាពអាហ្រ្វិក រហូតទាល់តែសណ្តាប់ធ្នាប់តាមរដ្ឋធម្មនុញ្ញ ត្រូវបានស្តារឡើងវិញ។ រីឯ​សមាគមនយោបាយនៃតំបន់អាហ្រ្វិកកណ្តាល ដែលមានហ្កាបុងជាសមាជិក ក៏បានថ្កោលទោសរដ្ឋប្រហារយោធាផងដែរ និងនិយាយថា ខ្លួនគ្រោងបើកកិច្ចប្រជុំបន្ទាន់មួយ រវាងប្រមុខរដ្ឋនៃបណ្តាប្រទេសជាសមាជិក ដើម្បីកំណត់អំពីមធ្យោបាយឆ្លើយតប ប៉ុន្តែមិនបញ្ជាក់ថា វានឹងប្រព្រឹត្តទៅនៅថ្ងៃណាឱ្យច្បាស់នោះទេ៕