(ប៉េកាំង)៖ ក្រសួងការពារជាតិ នាថ្ងៃព្រហស្បតិ៍នេះបាននិយាយថា ការទាក់ទងយោធានិងយោធា រវាងទីក្រុងប៉េកាំងនិងវ៉ាស៉ីនតោន មិនត្រូវបានបញ្ឈប់ឡើយ បើទោះបីជាភាពតានតឹងស្ថិតក្នុងកម្រិតខ្ពស់ក៏ដោយ រវាងកំពូលមហាអំណាចទាំងពីរ ជុំវិញបញ្ហាកោះតៃវ៉ាន់ សមុទ្រចិនខាងត្បូង និងរឿងជាច្រើនផ្សេងទៀត។ នេះបើតាមការចេញផ្សាយដោយ​ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី៣១ ខែសីហា ​ឆ្នាំ២០២៣។

ថ្លែងក្នុងសន្និសីទសារព័ត៌មានប្រចាំសប្តាហ៍ ​លោក វូ ឈាន (Wu Qian) ដែលជាអ្នកនាំពាក្យនៃក្រសួងការពារជាតិ បាននិយាយដូច្នេះថា ​«ខ្ញុំមានបំណងចង់គូសបញ្ជាក់ឱ្យច្បាស់ថា ​ការទាក់ទងយោធានិងយោធារវាងចិននិងសហរដ្ឋអាមេរិក គឺមិនត្រូវបានបញ្ឈប់នោះឡើយ»។ យ៉ាងណាមិញ លោក វូ បានបន្ថែមថា ការខ្វែងគំនិតគ្នាព្រមទាំងឧបសគ្គជាច្រើន គឺបន្តនៅមានក្នុងទំនាក់ទំនងរវាងប្រទេសទាំងពីរ។

គួរបញ្ជាក់ថា ចិនបានបដិសេធសំណើរបស់សហរដ្ឋអាមេរិក សម្រាប់ការរៀបចំកិច្ចប្រជុំរវាង​រដ្ឋមន្រ្តីការពារជាតិអាមេរិក លោក ឡយ អូស្ទីន (Lloyd Austin) ហើយនិងរដ្ឋមន្រ្តីការពារជាតិចិន លោក លី សាងហ្វូ (Li Shangfu) នៅក្រៅព្រឹត្តិការណ៍សន្និសីទអន្តរជាតិមួយ ​ស្តីពីបញ្ហាសន្តិសុខនៅឯប្រទេសសិង្ហបុរី កាលពីខែមិថុនា ឆ្នាំនេះ។ ​លោក លី ក៏ជាប់ទណ្ឌកម្មរបស់សហរដ្ឋអាមេរិកផងដែរ ចាប់តាំងពីឆ្នាំ​​២០១៨មក សម្រាប់ការសង្ស័យទិញសព្វាវុធពីប្រទេសរុស្ស៉ី៕