(ឡុងដ៏)៖ នៅក្នុងលិខិតសុំលាលែងពីតំណែងរដ្ឋមន្រ្តីការពារជាតិ ដាក់ជូនលោក រីស៉ី ស៊ូណាក់ (Rishi Sunak) នាយករដ្ឋមន្រ្តីអង់គ្លេស នៅថ្ងៃព្រហស្បតិ៍នេះ លោក បិន វ៉ាឡេស (Ben Wallace) បានបញ្ជាក់នូវការគាំទ្ររបស់លោកចំពោះរដ្ឋាភិបាល ប៉ុន្តែបានព្រមានកុំឲ្យមានការយល់ឃើញថា ការចំណាយលើវិស័យការពារជាតិ អាចធ្វើទៅបានស្រេចតែចិត្ត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី៣១ ខែសីហា ឆ្នាំ២០២៣។

ដោយអំពាវនាវ​ជា​ថ្មី​ចំពោះ​រដ្ឋាភិបាល​ កុំ​ឲ្យ​ងាក​មកកាត់បន្ថយការចំណាយលើវិស័យការពារ​ជាតិរបស់ប្រទេស លោក វ៉ាឡេស បាន​គូសបញ្ជាក់ថា «ក្រសួងការពារជាតិ​ ត្រូវតែទទួលការគាំទ្រ មិនថាតែនៅលើមាគ៌ា​លំដាប់​ពិភពលោក​ ឬក្នុងប្រទេសនោះទេ»។ក្នុងលិខិតឆ្លើយតប លោកនាយករដ្ឋមន្រ្តី ស៊ូណាក់ បានសរសើរ លោក វ៉ាឡេស សម្រាប់ការងារបម្រើប្រទេសជាតិ ហើយថាយល់ច្បាស់ពីបំណងប្រាថ្នារបស់ លោក វ៉ាឡេស ក្នុងការសម្រេចចិត្តចុះចេញពីតំណែងនេះ។

គួរបញ្ជាក់ថា លោក Grant Shapps ដែលបច្ចុប្បន្នជារដ្ឋមន្រ្តីសន្តិសុខថាមពល ត្រូវបានតែងតាំងជារដ្ឋមន្រ្តីការពារជាតិថ្មី។ លោក វ៉ាឡេស ដែលទទួលបន្ទុកដឹកនាំលើការឆ្លើយតបរបស់ចក្រភពអង់គ្លេស ​ចំពោះការឈ្លានពានរបស់រុស្ស៉ីនៅអ៊ុយក្រែន ធ្លាប់បាននិយាយកាលពីខែកក្កដាថា លោកចង់ចុះចេញពីតំណែងសព្វថ្ងៃដែលកាន់អស់រយៈពេល ៤ឆ្នាំ ហើយនឹងលាលែងពីតំណែង ​ជាសមាជិកសភានៅការបោះឆ្នោតបន្ទាប់ ដើម្បីស្វែងរកឱកាសថ្មីៗ៕