(ព័រវីឡា)៖ នាយករដ្ឋមន្រ្តីហ្វីជី លោក ស៉ីទីវេនី រ៉ាប៊ូកា (Sitiveni Rabuka) បានិយាយថា ក្រុមប្រទេសដែនកោះនៅតំបន់ប៉ាស៉ីហ្វិក គួរតែជាតំបន់មួយនៃសុខសន្តិភាព ហើយលោករំពឹងថា ការប្រកួតប្រជែងឥទ្ធិពលគ្នារវាងសហរដ្ឋអាមេរិកនិងចិន នៅក្នុងតំបន់យុទ្ធសាស្រ្ត​មួយនេះ នឹងមិនវិវឌ្ឍទៅជាសង្រ្គាមឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី២៥ ខែសីហា ឆ្នាំ២០២៣។

លោក រ៉ាប៊ូកា បានថ្លែងដូចខាងលើ ក្រោយចូលរួមកិច្ចប្រជុំកំពូលមួយ រវាងមេដឹកនាំនៃប្រទេសដែនកោះប៉ាស៉ីហ្វិកមួយចំនួន ហើយបញ្ហា​​ពាក់ព័ន្ធទៅនឹងការប្រែប្រួលអាកាសធាតុ និងសន្តិសុខក្នុងតំបន់ គឺជាប្រធានបទចម្បងនៅក្នុងរបៀបវារៈ។ មេដឹកនាំនៃប្រទេសស៉ូឡូម៉ុន វ៉ានូទូ ប៉ាពូអាស៉ីនូវែលហ្គីណេ ហ្វីជី​ និងគណបក្សកាន់អំណាច FLNKS នៃដែនកោះ នូវែលកាឡេដូនី (New Caledonia) បានជួបប្រជុំគ្នាកាលពីថ្ងៃព្រហស្បតិ៍សប្តាហ៍នេះ នៅប្រទេសដែនកោះ វ៉ានូទូ។

លោកនាយករដ្ឋមន្រ្តីហ្វីជី បានលើកឡើងក្នុងសេចក្តីថ្លែងការណ៍ នៅថ្ងៃសុក្រនេះយ៉ាងដូច្នេះថា «ពួកគេកំពុងព្យាយាមបែងចែកប៉ាស៉ីហ្វិក ទៅជាជំរំបក្ខពួក​របស់ពួកគេ ដូច្នេះហើយពួកយើងត្រូវតែប្រាកដប្រជាបំផុតថា អ្វីៗដែលយើងធ្វើគឺពួកយើងគិតគូរអំពី តម្រូវការរួមដែលចង់ឱ្យប៉ាស៉ីហ្វិកជា​តំបន់មួយនៃសុខសន្តិភាព ជាតំបន់មួយដែលមិនចូលបក្សសម្ព័ន្ធ។ យើងសង្ឃឹមថា ការប្រជែងឥទ្ធិពលរវាងមហាអំណាច នឹងមិនវិវឌ្ឍទៅ​ជាជម្លោះយោធា ឬឈានដល់ដំណាក់កាលមួយ ដែលនឹងមើលឃើញការប្រមូលផ្តុំកងកម្លាំងយោធាឬសព្វាវុធ នៅក្នុងតំបន់នេះឡើយ»។

គួរបញ្ជាក់ថា ដែនកោះប៉ាស៉ីហ្វិកទាំង៥ខាងលើ ដែលមានទីតាំងសំខាន់សម្រាប់ផ្នែកយុទ្ធសាស្រ្ត ដោយស្ថិតនៅតំបន់ប៉ាស៉ីហ្វិកខាងត្បូង ហើយធ្លាប់មានសារសំខាន់ខ្លាំង កាលពីអំលុងសម័យសង្រ្គាមលោកលើកទី២ នាពេលនេះកំពុងតែស្ថិតនៅចំណុចកណ្តាល នៃការប្រជែង​ឥទ្ធិពលភូមិសាស្រ្តនយោបាយសាជាថ្មីម្តងទៀត គឺសូឡូម៉ុនបានចុះកិច្ចព្រមព្រៀងសន្តិសុខជាមួយចិន ហើយប៉ាពូអាស៉ីនូវែលហ្គីណេ ​បានចុះកិច្ចព្រមព្រៀង​កិច្ចសហប្រតិបត្តិការការពារជាតិជាមួយសហរដ្ឋអាមេរិក ខណៈហ្វីជីកាលពីសប្តាហ៍មុនបានរួមគ្នាជាមួយអាមេរិក ធ្វើជាម្ចាស់ផ្ទះរៀបចំសន្និសីទប្រមុខការពារជាតិនៃតំបន់ឥណ្ឌូ-ប៉ាស៉ីហ្វិក ដែលមានវត្តមានចិនចូលរួមផងដែរ៕