(បាងកក)៖ នៅថ្ងៃព្រហស្បតិ៍នេះ នាយករដ្ឋមន្រ្តីថ្មីនៃប្រទេសថៃ លោក ស្រេតថា ថាវីស៉ីន (Srettha Thavisin) បានជួបពិភាក្សាគ្នា​អំពីមធ្យោបាយដើម្បីជម្នះ បញ្ហានៃភាពបែកបាក់ខាងផ្នែកនយោបាយ ជាមួយអតីតនាយករដ្ឋមន្រ្តី លោក ប្រាយុទ្ធ ចាន់អូចា ខណៈរូបលោក​កំពុងត្រៀមបង្កើតគណៈរដ្ឋមន្រ្តី ចេញពីសម្ព័ន្ធភាពមួយ ដែលមានគណបក្សសរុបដល់ទៅ១១ ក្នុងនោះរួមមានទាំងអតីតគូប្រជែងគ្នាផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៤ ខែសីហា ឆ្នាំ២០២៣។

លោក Srettha ដែលបានក្លាយជានាយករដ្ឋមន្រ្តីថៃទី៣០ ក្រោយត្រូវបានសភាថៃបោះឆ្នោតអនុម័តគាំទ្រ កាលពីថ្ងៃអង្គារសប្តាហ៍នេះ នឹងត្រូវដឹកនាំរដ្ឋាភិបាលចម្រុះមួយ ក្នុងនោះរួមមានគណបក្សមួយចំនួន ដែលគាំទ្រដោយយោធា។ យោធាថៃធ្លាប់ធ្វើរដ្ឋប្រហារម្តងហើយ​ម្តងទៀត ប្រឆាំងនឹងរដ្ឋាភិបាលដែលដឹកនាំគណបក្ស ភឿថៃ (Pheu Thai) របស់លោក​ ខណៈលោក ប្រាយុទ្ធ ចាន់អូចា ផ្ទាល់ គឺជាមេដឹកនាំ​រដ្ឋប្រហារយោធា កាលពីឆ្នាំ២០១៤។ លោក ប្រាយុទ្ធ បានបន្តកាន់អំណាចអស់រយៈពេលប្រមាណជា៩ឆ្នាំ ចាប់តាំងពីពេលនោះមក។

ថ្លែងអំពីជំនួបរបស់លោក ជាមួយលោក ប្រយុទ្ធ លោក Srettha បាននិយាយយ៉ាងដូច្នេះថា «បញ្ហានៃភាពបែកបាក់ផ្នែកនយោបាយសព្វថ្ងៃ​ នឹងពិបាកក្នុងការជម្នះឱ្យបានណាស់។ កិច្ចសន្ទនាតែមួយលើកនឹងមិនអាចដោះស្រាយវាឱ្យចប់ទេ គឺត្រូវចំណាយពេលយូរ។ ទោះជាបែបនេះក្តី ខ្ញុំយល់ពីបំណងរបស់លោក ប្រាយុទ្ធ គឺលោកចង់ជម្នះបញ្ហានេះដូចគ្នា ហើយលោកក៏ខ្វាយខ្វល់អំពីប្រទេសខ្លាំងផងដែរ»។ នៅពេលត្រូវ​​ក្រុមអ្នកកាសែតសាកសួរ ថាតើលោក ប្រាយុទ្ធ បានផ្តល់ការណែនាំបែបណានោះ លោក Srettha បានឆ្លើយតបថា «លោកប្រាប់ឱ្យខ្ញុំ ធ្វើអារម្មណ៍ឱ្យស្ងប់ មានការអត់ធ្មត់ ហើយការពារប្រទេសនិងរបបរាជានិយម»។

គួរបញ្ជាក់ថា លោក​ Srettha គឺជាមហាសេដ្ឋីចលនទ្រព្យ ដែលទើបតែឈានជើងចូលប្រឡូកក្នុងឆាកនយោបាយប៉ុណ្ណោះ ហើយលោក​មិនមានបទពិសោធក្នុងរដ្ឋាភិបាលឡើយ។ ការក្លាយខ្លួនជានាយករដ្ឋមន្រ្តីយ៉ាងរលូនរបស់លោក ក៏បានបង្កឱ្យមានមតិមួយចំនួនលើកឡើងផងដែរថា គណបក្ស Pheu Thai ប្រហែលមានកិច្ចព្រមព្រៀងសម្ងាត់ជាមួយ យោធានិងក្រុមអភិរក្សនិយម​ ដែលក្នុងនោះរួមមាន​ទាំងការត្រឡប់ចូលស្រុកវិញ នៃអតីតនាយករដ្ឋមន្រ្តីថៃ លោក ថាក់ស៉ីន​ ស៉ីណាវ៉ាត់ ដែលជាអ្នកជ្រោមជ្រែងនៅពីក្រោយ គណបក្ស Pheu Thai៕