(ញូដេលី)៖ អាជ្ញាធរនៅប្រទេសឥណ្ឌាបានឱ្យដឹងថា មានមនុស្សយ៉ាងហោច១៧នាក់ ដែលកំពុងធ្វើការងារនៅការដ្ឋានសាងសង់ស្ពានផ្លូវដែកមួយខ្សែ ស្ថិតនៅក្នុងរដ្ឋ Mizoram ភាគខាងកើតប្រទេស បានបាត់បង់ជីវិត នៅពេលដែលស្ពាននោះបានបាក់នាថ្ងៃពុធនេះ។ នេះបើតាម​ការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី២៣ ខែសីហា ឆ្នាំ២០២៣។

ប្រមុខរដ្ឋបាលនៃរដ្ឋ Mizoram លោក ហ្សូរ៉ាមថានហ្កា (Zoramthanga) បាននិយាយយ៉ាងដូច្នេះថា «ស្ពានផ្លូវរថភ្លើងមួយខ្សែ ដែល​កំពុងស្ថិតក្រោមដំណើរការសាងសង់ នៅឯក្រុង Sairang នៃស្រុក Aizawl បានបាក់នាថ្ងៃនេះ ហើយកម្មករយ៉ាងហោចចំនួន១៧នាក់ បានស្លាប់»។ ជាមួយគ្នានេះ កាសែតក្នុងស្រុកឥណ្ឌា Indian Express ដែលផ្អែកលើសម្តីរបស់ប៉ូលិស បានរាយការណ៍ថា សាកសព​មនុស្ស១៧នាក់ ត្រូវយកបាន ប៉ុន្តែនៅមានជាច្រើននាក់ទៀតបាត់ខ្លួន។ យ៉ាងណាមិញ សេចក្តីរាយការណ៍ ពាក់ព័ន្ធនឹងមនុស្សបាត់ខ្លួននេះ គឺមិនទាន់អាចត្រូវផ្ទៀងផ្ទាត់នៅឡើយទេ។

គួរបញ្ជាក់ថា យោងតាមសេចក្តីថ្លែងការណ៍ ពីការិយាល័យនាយករដ្ឋមន្រ្តីឥណ្ឌា ខាងរដ្ឋាភិបាលនឹងផ្តល់ប្រាក់ឧបត្ថម្ភចំនួន២,៤០០ដុល្លារ ដល់គ្រួសាររបស់អ្នកដែលបានបាត់បង់ជីវិតទាំងនោះ។ នៅក្នុងប្រទេសឥណ្ឌា ឧបទ្ទវហេតុនៅតាមការដ្ឋានសាងសង់ហេដ្ឋារចនាសម្ព័ន្ធធំៗ គឺជារឿងដែលតែងកើតមានឡើងជាញឹកញាប់៕