(ហាវ៉ៃ)៖ អាជ្ញាធរអាមេរិកបានឱ្យដឹង កាលពីថ្ងៃអង្គារសប្តាហ៍នេះ​ថា មនុស្សយ៉ាងហោចចំនួន១,១០០នាក់ កំពុងតែបន្តបាត់ខ្លួននៅឡើយ ទោះរយៈពេល២សប្តាហ៍ បានកន្លងផុតទៅក៏ដោយ ក្រោយភ្លើងឆេះព្រៃដ៏អាក្រក់ បានវាយប្រហារលើកោះ Maui នៃរដ្ឋ Hawaii។ ​នេះ​បើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៣ ខែសីហា ឆ្នាំ២០២៣។

ភ្លើងឆេះព្រៃខាងលើបានជាប់ឈ្មោះជា ភ្លើងឆេះព្រៃដែលបានផ្តាច់ជីវិតមនុស្សច្រើនបំផុត នៅសហរដ្ឋអាមេរិក គិតក្នុងរយៈពេលប្រមាណ​១ទសវត្សរ៍មកនេះ ជាមួយចំនួនអ្នកស្លាប់សរុបយ៉ាងហោច១១៥នាក់។ ក្រុងរីសតប្រវត្តិសាស្រ្ត Lahaina ដែលជាកន្លែងដ៏ពេញនិយមមួយសម្រាប់​ភ្ញៀវទេសចរ និងជាជម្រក របស់មនុស្ស១២,០០០នាក់ បានរងការបំផ្លិចបំផ្លាញយ៉ាងហិនហោច ហើយមនុស្សបាត់ខ្លួនខ្ទង់ពាន់នាក់ បានលេច​ឈ្មោះនៅតាមបញ្ជីរបស់ស្ថាប័នផ្សេងៗ រួមមានទាំងប៉ូលិស កាកបាទក្រហម និងមជ្ឈមណ្ឌលជ្រកកោន។

គួរបញ្ជាក់ថា នាពេលនេះ ប៉ូលិស FBI អាមេរិក កំពុងប្រមែប្រមូលនិងផ្ទៀងផ្ទាត់ទិន្នន័យទាំងនោះ ហើយគិតត្រឹមថ្ងៃអង្គារ ពួកគេបានរាប់​ឃើញអ្នកបាត់ខ្លួនចំនួន១,១០០នាក់ ខណៈតួលេខនេះទំនងជានឹងកើនថែមទៀត។ FBI ក៏បានស្នើសុំជំនួយពីសមាជិកគ្រួសារជនរងគ្រោះ ដើម្បីកំណត់អត្តសញ្ញាណអ្នកដែលបានបាត់បង់ជីវិតផងដែរ ដ្បិតមកទល់ឥឡូវ សាកសពតែ២៧នាក់ប៉ុណ្ណោះ ក្នុងចំណោមជនរងគ្រោះ​ទាំង១១៥នាក់ ត្រូវបានកំណត់អត្តសញ្ញាណ៕