(នីហ្សេ)៖ សហភាពអាហ្រ្វិក (AU) បាននិយាយនៅក្នុងសេចក្តីថ្លែងការណ៍មួយ ដែលបានចេញផ្សាយនៅថ្ងៃអង្គារនេះថា ខ្លួនបានផ្អាកសកម្មភាពទាំងអស់របស់ប្រទេសនីហ្សេ បន្ទាប់ពីរដ្ឋប្រហារយោធាកាលពីថ្ងៃទី ២៦ ខែកក្កដា ដោយបានរំលឹកឡើងវិញនូវការអំពាវនាវរបស់ខ្លួន ឱ្យមេដឹកនាំរដ្ឋប្រហារ ដោះលែងប្រធានាធិបតីជាប់ឆ្នោត លោក Mohamed Bazoum ហើយត្រឡប់ទៅបន្ទាយរបស់ពួកគេវិញ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន​ AFP នៅថ្ងៃអង្គារ ទី២២ ខែសីហា ឆ្នាំ២០២៣។

សហភាពអាហ្រ្វិក (AU) ក៏បានអំពាវនាវឱ្យរដ្ឋសមាជិកទាំងអស់ និងសហគមន៍អន្តរជាតិ បដិសេធពីសកម្មភាពណាមួយ ដែលអាចផ្តល់ភាពស្របច្បាប់ដល់របបយោធានៅនីហ្សេ និងបង្ហាញការប្រឆាំងយ៉ាងខ្លាំងរបស់ខ្លួន ចំពោះការជ្រៀតជ្រែកពីតួអង្គ ឬប្រទេសណាមួយនៅក្រៅទ្វីបអាហ្វ្រិកផងដែរ។

ក្រុមប្រឹក្សាសន្តិភាព និងសន្តិសុខនៃសហភាពអាហ្រ្វិក បានកត់សម្គាល់ពីការសម្រេចចិត្តរបស់ប្លុកអាហ្វ្រិកខាងលិច (ECOWAS) ដែលថា ប្លុកនេះអាចនឹងធ្វើអន្តរាគមន៍យោធាក្នុងប្រទេសនេះ ក្នុងករណីកិច្ចខិតខំប្រឹងប្រែងការទូតបរាជ័យ ហើយបាន​ស្នើ​ឲ្យ​គណៈកម្មការ​សហភាព​អាហ្វ្រិក​ វាយតម្លៃ​ផលប៉ះពាល់​សេដ្ឋកិច្ច សង្គម និង​សន្តិសុខ​នៃ​ការ​ពង្រាយ​កម្លាំង​បែបនេះ។

គួរជម្រាបថា សហគមន៍សេដ្ឋកិច្ចនៃរដ្ឋអាហ្រ្វិកខាងលិច ដែលហៅកាត់ថា ECOWAS បាននិងកំពុងព្យាយាមចរចាជាមួយរបបយោធា ប៉ុន្តែនិយាយថា ខ្លួនត្រៀមខ្លួនជាស្រេចក្នុងការបញ្ជូនកងទ័ពចូលទៅក្នុងប្រទេសនីហ្សេ ដើម្បីស្តារសណ្តាប់ធ្នាប់ប្រសិនបើកិច្ចខិតខំប្រឹងប្រែងការទូតបរាជ័យ។

រដ្ឋប្រហារកាលពីខែមុនក្នុងប្រទេសនីហ្សេ បានបង្កឱ្យមានការភ្ញាក់ផ្អើលក្នុងចំណោមសម្ព័ន្ធមិត្តលោកខាងលិច និងរដ្ឋអាហ្វ្រិកប្រជាធិបតេយ្យ ដែលភ័យខ្លាចថា វាអាចអនុញ្ញាតឱ្យក្រុមអ៊ីស្លាមសកម្មនៅក្នុងតំបន់ Sahel ពង្រីកវិសាលភាពរបស់ពួកគេ និងផ្តល់ឱ្យរុស្ស៊ីនូវជំហរដើម្បីបង្កើនឥទ្ធិពលក្នុងតំបន់៕