(វ៉ាស៉ីនតោន)៖ ស្របពេលដែលព្យុះហឺរីខិនកម្រិត៤ ឈ្មោះ Hilary កំពុងសំដៅមករកឧបទ្វីប Baja California នៃប្រទេសម៉ិកស៉ិក អាជ្ញាធរអាមេរិកបានព្រមានឱ្យរដ្ឋ California បង្កើនការប្រុងប្រយ័ត្នខ្ពស់ជាពិសេស អំពីគ្រោះទឹកជំនន់ ដែលអាចនឹងកើតមានឡើងក្នុងកម្រិតធ្ងន់ធ្ងរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី១៩ ខែសីហា ឆ្នាំ២០២៣។

មជ្ឈមណ្ឌលជាតិតាមដានព្យុះហឺរីខិន NHC របស់សហរដ្ឋអាមេរិក បានលើកឡើងយ៉ាងដូច្នេះថា «គ្រោះទឹកជំនន់ ដែលអាចគំរាមកំហែង​ដល់អាយុជីវិតនិងបង្កជាមហន្តរាយធ្ងន់ធ្ងរ ទំនងនឹងកើតឡើងនៅលើផ្នែកមួយភាគធំនៃឧបទ្វីប Baja California ព្រមទាំងភាគខាងត្បូង​រដ្ឋ California នាអំលុងចុងសប្តាហ៍នេះ និងឈានដល់អំលុងដើមសប្តាហ៍ក្រោយ»។ NHC បានព្រមានពីហានិភ័យគ្រោះទឹកជំនន់ ចាប់ពី​ទីក្រុង San Diego និង Los Angeles ដល់ទីក្រុង Las Vegas នៅរដ្ឋ Nevada ខណៈកន្លែងប្រឈមហានិភ័យខ្ពស់ជាពិសេស គឺតំបន់ Palm Springs។

គួរបញ្ជាក់ថា នៅខាងប្រទេសម៉ិកស៉ិកវិញ ឧបទ្វីប Baja California លាតសន្ធឹងលើរដ្ឋចំនួន២ គឺរដ្ឋ Baja California ដែលស្ថិតនៅ​ភាគខាងជើង និងរដ្ឋ Baja California Sur ដែលនៅភាគខាងត្បូង។ រដ្ឋទាំង២ សុទ្ធតែបានចាត់វិធានការបង្ការផ្សេងៗរួចជាស្រេច ដើម្បីត្រៀមសម្រាប់ការមកដល់នៃព្យុះហឺរីខិន Hilary៕