(សេអ៊ូល)៖ ដោយផ្អែកលើប្រភពពីទីភ្នាក់ងារចារកម្មរបស់ប្រទេសខ្លួនផ្ទាល់ សមាជិកសភាកូរ៉េខាងត្បូងម្នាក់ បាននិយាយថា កូរ៉េខាងជើង​អាចនឹងព្យាយាមបាញ់បង្ហោះ ផ្កាយរណបសម្រាប់ស៉ើបការណ៍យោធាជាថ្មីម្តងទៀត នៅខ្ទង់ចុងខែសីហានេះ ឬក៏នៅដើមខែកញ្ញាខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី១៧ ខែសីហា ឆ្នាំ២០២៣។

ការប៉ុនប៉ងបាញ់បង្ហោះផ្កាយរណបស៉ើបការណ៍យោធាលើកដំបូង របស់ទីក្រុងព្យុងយ៉ាងកាលពីខែឧសភាកន្លងទៅ គឺបានទទួលបរាជ័យ ប៉ុន្តែកូរ៉េខាងជើងបានប្តេជ្ញាយ៉ាងមុតមាំថា នឹងព្យាយាមធ្វើម្តងទៀតក្នុងពេលឆាប់ៗ។ ក្រោយជួបពិភាក្សាជាមួយ ប្រមុខ​​ទីភ្នាក់ងារចារកម្មកូរ៉េខាងត្បូង សមាជិកសភាកូរ៉េខាងត្បូង លោក យូ សាងប៊ុម (Yoo Sang Bum) បានប្រាប់​ថា ប្រសិនបើកូរ៉េខាងជើងអាចជួសជុលបញ្ហាបាននោះ គឺវាអាចទៅរួចដែលកូរ៉េខាងជើង ទំនងនឹងបង្ហោះផ្កាយរណបចារកម្ម ដើម្បីអបអរខួបនៃការបង្កើតប្រទេសរបស់ខ្លួន ដែលត្រូវប្រារព្ធឡើងនៅ​ថ្ងៃទី៩ ខែកញ្ញា។

គួរបញ្ជាក់ថា​ បើតាមលោក យូ កូរ៉េខាងជើងក៏កំពុងត្រៀមលក្ខណៈធ្វើសកម្មភាពយោធាផ្សេងៗទៀតផងដែរ រួមមានទាំងការបាញ់មីស៉ីលបាលិស្ទីគអន្តរទ្វីប ICBM ដើម្បីប្រឆាំងនឹងកិច្ចប្រជុំកំពូលត្រីភាគីរវាងសហរដ្ឋអាមេរិក កូរ៉េខាងត្បូង និងជប៉ុន​ ក៏ដូចជាដើម្បីប្រឆាំងសមយុទ្ធយោធារួម ​រវាងទីក្រុងវ៉ាស៉ីនតោននិងទីក្រុងសេអ៊ូល។ ប្រធានាធិបតីអាមេរិក លោក ចូ បៃដិន នឹងត្រូវបើកកិច្ចប្រជុំកំពូលនាថ្ងៃសុក្រសប្តាហ៍នេះ ជាមួយ​ប្រធានាធិបតីកូរ៉េខាងត្បូង លោក យូន ស៊ុកយុល និងនាយករដ្ឋមន្រ្តីជប៉ុន លោក ហ្វូមីអុ គីស៉ីដា នៅសហរដ្ឋអាមេរិក៕