(តៃប៉ិ)៖ ក្រសួងការពារជាតិតៃវ៉ាន់ នាថ្ងៃអង្គារនេះ បាននិយាយថា មកទល់ឥឡូវ គឺមិនទាន់ឃើញមានការធ្វើសមយុទ្ធយោធាទ្រង់ទ្រាយធំ ឬក៏សកម្មភាពគួរឱ្យកត់សម្គាល់ណាមួយ នៅឡើយទេដោយទីក្រុងប៉េកាំងនៅក្បែរដែនកោះនេះ បន្ទាប់ពីចិនបានចេញមុខថ្កោលទោស លើ​ដំណើរទស្សនកិច្ចរយៈពេលខ្លី របស់មេដឹកនាំរងកោះតៃវ៉ាន់ គឺលោក វីលៀម ឡៃ (William Lai) នៅឯសហរដ្ឋអាមេរិក។ នេះបើតាម​​ការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៥ ខែសីហា ឆ្នាំ២០២៣។

កាលពីថ្ងៃអាទិត្យចុងសប្តាហ៍កន្លងទៅនេះ ចិនបានថ្កោលទោសវត្តមានរបស់លោក ឡៃ នៅទីក្រុងញូយ៉ក ក្នុងឱកាសដែលរូបលោកត្រូវធ្វើដំណើរឆ្ពោះ​ទៅបំពេញទស្សនកិច្ច នៅប្រទេសប៉ារ៉ាហ្កាយ។ ទីក្រុងប៉េកាំងបានហៅលោក ឡៃ ថាជាជនប៉ុនប៉ង់បំបែករដ្ឋ និងជាបុគ្គលចូលចិត្តបង្កើតបញ្ហា ហើយបានព្រមានថា ខ្លួននឹងចាត់វិធានការយ៉ាងម៉ឹងម៉ាត់ ដើម្បីការពារអធិបតេយ្យរបស់ប្រទេសចិន។ តៃវ៉ាន់គឺជាដែនកោះដែលចិនចាត់ទុក ជាផ្នែកមិនអាចកាត់ផ្តាច់បាននៃទឹកដីរបស់ខ្លួន។

កន្លងមកនេះ ក្រុមមន្រ្តីទីក្រុងតៃប៉ិបាននិយាយថា ចិនទំនងនឹងយកលេសទស្សនកិច្ចរបស់លោក ឡៃ ដើម្បីធ្វើសមយុទ្ធយោធាទ្រង់ទ្រាយធំ នៅក្បែរកោះតៃវ៉ាន់ ក្រោមគោលដៅបម្រើជាការដាក់សម្ពាធមួយ នៅមុនការបោះឆ្នោតជ្រើសរើសមេដឹកនាំតៃវ៉ាន់ថ្មី ដែលនឹងត្រូវប្រព្រឹត្តទៅ​នាដើមឆ្នាំក្រោយ ដ្បិតលោក ឡៃ គឺជាបុគ្គលកំពុងមានប្រជាប្រិយភាពនាំមុខគ្នា។

អ្នកនាំពាក្យក្រសួងការពារជាតិតៃវ៉ាន់ លោក ស៊ុន លីហ្វាង (Sun Li Fang) បានលើកឡើងថា វាគឺជាការទទួលខុសត្រូវមួយរបស់ កងកម្លាំងយោធាតៃវ៉ាន់ ក្នុងការតាមដានសកម្មភាពនានារបស់ចិន នៅក្បែរដែនកោះនេះ។ លោក ស៊ុន បានបន្តថា កងទ័ពតៃវ៉ាន់បន្ត​ប្រកាន់ខ្ជាប់ នូវស្មារតីមិនភ័យខ្លាចសត្រូវប៉ុន្តែតែមិនបង្កហេតុមុន នៅពេលប្រឈមសកម្មភាពគ្រប់បែបយ៉ាងរបស់ចិន ប៉ុន្តែមកទល់ឥឡូវ តៃវ៉ាន់មិនទាន់សង្កេតឃើញ សមយុទ្ធឬសកម្មភាពទ្រង់ទ្រាយធំណាមួយ ត្រូវបានធ្វើឡើងដោយយោធាចិននៅឡើយទេ។ អ្នកនាំពាក្យដដែល បានសង្កត់ធ្ងន់ថា ទោះជាបែបនេះក៏ដោយ មិនមែនមានន័យថា តៃវ៉ាន់នឹងបន្ថយការប្រុងប្រយ័ត្ន ឬការតាំងចិត្តត្រៀមលក្ខណៈសម្រាប់​សង្រ្គាមនោះឡើយ។

គួរបញ្ជាក់ថា លោក វីលៀម ឡៃ ​នឹងត្រូវត្រឡប់មកដល់ទីក្រុងតៃប៉ិ នៅថ្ងៃសុក្រសប្តាហ៍នេះ ប៉ុន្តែនៅតាមផ្លូវត្រឡប់ពីប្រទេសប៉ារ៉ាហ្កាយវិញ លោកនឹងឆ្លៀតចូលទស្សនកិច្ចនៅសហរដ្ឋអាមេរិកម្តងទៀត គឺនៅទីក្រុងសាន់ហ្រ្វាន់ស៉ីស្កូ។ លើកចុងក្រោយបំផុត ដែលចិនបាន​ធ្វើសមយុទ្ធយោធាក្នុងលក្ខណៈទ្រង់ទ្រាយធំ នៅជុំវិញកោះតៃវ៉ាន់ គឺកាលពីខែមេសា​ ឆ្នាំនេះ មួយថ្ងៃបន្ទាប់ពីមេដឹកនាំតៃវ៉ាន់ លោកស្រី សៃ អ៉ីងវិន (Tsai Ing Wen) បានឆ្លៀតចូលទស្សនកិច្ចនៅរដ្ឋកាលីហ្វរញ៉ា ជាទីដែលលោកស្រីបានជួបជាមួយ ប្រធានសភាតំណាងរាស្រ្តអាមេរិក លោក ខេវិន ម៉ាក់ខឺធី (Kevin McCarthy) បន្ទាប់ពីលោកស្រី ត្រឡប់ពីបំពេញទស្សនកិច្ចនៅឯ​តំបន់អាមេរិកកណ្តាល៕