(ហាវ៉ៃ)៖ អាជ្ញាធររដ្ឋហាវ៉ៃបានឱ្យដឹងថា នាពេលនេះ តួលេខមនុស្សដែលបាត់បង់ជីវិតដោយសារភ្លើងឆេះព្រៃ នៅលើកោះ Maui បានបន្ត​កើនដល់ ៩៣នាក់ហើយ ជាហេតុធ្វើឱ្យវាក្លាយជាភ្លើងឆេះព្រៃនៅសហរដ្ឋអាមេរិក ដែលសម្លាប់មនុស្សច្រើនបំផុត បើគិតក្នុងរយៈពេលជាងមួយសតវត្សរ៍ចុងក្រោយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី១៣ ខែសីហា ឆ្នាំ២០២៣។

គួរបញ្ជាក់ថា ជាមួយតួលេខអ្នកស្លាប់៩៣នាក់នេះ ភ្លើងឆេះព្រៃនៅកោះ Maui បានក្លាយជាភ្លើងឆេះព្រៃដែលឆក់យក ជីវិតមនុស្សច្រើនជាងគេបង្អស់នៅសហរដ្ឋអាមេរិក គឺលើសភ្លើងឆេះព្រៃ Camp Fire ដែលបានកើតឡើង​កាលពីខែវិច្ឆិកា ឆ្នាំ២០១៨ នៅរដ្ឋកាលីហ្វរញ៉ា ហើយសម្លាប់មនុស្សយ៉ាងហោច៨៥នាក់។ មិនតែប៉ុណ្ណោះ វាគឺជាតួលេខខ្ពស់បំផុត នៃការស្លាប់ដោយសារភ្លើងឆេះព្រៃនៅអាមេរិក គិតចាប់តាំងតែពីឆ្នាំ១៩១៨មក នៅពេល​ភ្លើងឆេះព្រៃ Cloquet បានសម្លាប់មនុស្សសរុបរហូតដល់៤៥៣នាក់ ក្នុងរដ្ឋ Minnesota និងរដ្ឋ Wisconsin។

ភ្លើងឆេះព្រៃខាងលើបានចាប់ផ្តើមកាលពីថ្ងៃអង្គារសប្តាហ៍នេះ ហើយអណ្តាតភ្លើងរបស់វា បានលេបត្របាក់ស្ទើរទាំងស្រុងលើទីក្រុងប្រវត្តិសាស្រ្ត Lahaina ដែលជាទីកន្លែងដ៏ពេញនិយមមួយប្រចាំរដ្ឋហាវ៉ៃ សម្រាប់ភ្ញៀវទេសចរ។ ទីភ្នាក់ងារសហព័ន្ធផ្នែកគ្រប់គ្រងគ្រោះអាសន្ន FEMA បានវាយតម្លៃថា ថ្លៃចំណាយសម្រាប់ការកសាងទីក្រុងនេះឡើងវិញ គឺខ្ទង់៥.៥ពាន់លានដុល្លារ ដោយសំណង់ច្រើនជាង២,២០០ខ្នង បានរងការខូចខាតឬបំផ្លាញ​ទាំងស្រុង ហើយផ្ទៃដីជាង៨៥០ហិកតា ត្រូវបានឆាបឆេះ៕