(ម៉ានីល)៖ ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនដឺ លីយែន (Ursula von der Leyen) បាននិយាយនៅថ្ងៃចន្ទនេះថា សហភាពអឺរ៉ុប (EU) ត្រៀមលក្ខណៈជាស្រេច ដើម្បីពង្រឹងកិច្ចសហប្រតិបត្តិការជាមួយប្រទេសហ្វីលីពីន ជុំវិញបញ្ហាសន្តិសុខដែនសមុទ្រ ខណៈ​លោកស្រីបានសង្កត់ធ្ងន់អំពីសារសំខាន់ នៃតំបន់ឥណ្ឌូ-ប៉ាស៉ីហ្វិកមួយ ដែលសេរីនិងបើកចំហ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី៣១ ខែកក្កដា ឆ្នាំ២០២៣។

លោកស្រីប្រមុខគណៈកម្មាការអឺរ៉ុប បាននិយាយដូចខាងលើ ក្រោយជួបពិភាក្សាជាមួយប្រធានាធិបតីហ្វីលីពីន​ លោក ហ្វឺឌីណាន់ ម៉ាកូស ចេអរ (Ferdinand Marcos Jr.) នៅឯទីក្រុងម៉ានីល ជាទីដែលមេដឹកនាំទាំងពីរ បានជជែកគ្នាអំពីបញ្ហាជាច្រើន មានចាប់តាំងពីសន្តិសុខ និងពាណិជ្ជកម្ម រហូតដល់ការប្រែប្រួលនៃអាកាសធាតុ។

ថ្លែងក្នុងសន្និសីទសារព័ត៌មានរួមគ្នា ជាមួយលោក ម៉ាកូស លោកស្រី វ៉ុនដឺ លីយែន បានលើកឡើងដូច្នេះថា «យើងត្រៀមខ្លួនរួចរាល់ហើយ ដើម្បីពង្រឹងកិច្ចសហប្រតិបត្តិការ ជាមួយហ្វីលីពីន ជុំវិញបញ្ហាសន្តិសុខដែនសមុទ្រនៅក្នុងតំបន់ តាមរយៈការចែករំលែកព័ត៌មាន ការវាយ​តម្លៃលើការគំរាមកំហែង និងការកសាងសមត្ថភាពនៃឆ្មាំសមុទ្ររបស់អ្នក»។ ហ្វីលីពីនជាប្រទេសមួយ ដែលស្ថិតនៅចំណុចកណ្តាលនៃការប្រជែង ​ឥទ្ធិពលភូមិសាស្រ្តនយោបាយរវាងអាមេរិកនិងចិន ហើយក៏មានបញ្ហាវិវាទដែនសមុទ្រជាមួយទីក្រុងប៉េកាំង នៅតំបន់សមុទ្រចិនខាងត្បូង ថែមទៀតផង។

ជាចុងក្រោយ លោកស្រី វ៉ុនដឺ លីយែន ក៏បានសង្កត់ធ្ងន់ផងដែរថា «តំបន់ឥណ្ឌូ-ប៉ាស៉ីហ្វិកមួយ ដែលគ្មានការគំរាមកំហែងនិងការសម្លុត​គំរាម គឺជាកូនសោគន្លឹះ សម្រាប់ស្ថិរភាព សន្តិភាព និងវិបុលភាព របស់យើងទាំងអស់គ្នា»។ វត្តមានលោកស្រីនៅទីក្រុងម៉ានីល គឺជា​ដំណើរបំពេញទស្សនកិច្ចលើកទីមួយ​ ដោយប្រធានគណៈកម្មការអឺរ៉ុបនៅហ្វីលីពីន ក្នុងរយៈពេលជិត៦ទសវត្សរ៍៕