(សាំងពេទឺប៊ឺគ)៖ មេដឹកនាំអាហ្វ្រិកនៅថ្ងៃសុក្រសប្តាហ៍នេះ បានដាក់សម្ពាធលើប្រធានាធិបតីរុស្ស៊ី លោក វ្ល៉ាឌីមៀ ពូទីន ឱ្យបន្តផែនការសន្តិភាពដើម្បីបញ្ចប់សង្រ្គាមនៅអ៊ុយក្រែន និងបន្តកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន ដែលទីក្រុងម៉ូស្គូបានលុបចោលកាលពីសប្តាហ៍មុន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃសុក្រ ទី២៨ ខែកក្កដា ឆ្នាំ២០២៣។

ទោះបីជាពួកមេដឹកនាំអាហ្វ្រិកទាំងនេះ មិនបានរិះគន់រុស្ស៊ីដោយផ្ទាល់ទៅលើការឈ្លានពានអ៊ុយក្រែនក៏ដោយ ក៏អន្តរាគមន៍របស់ពួកគេនៅថ្ងៃទីពីរ នៃកិច្ចប្រជុំកំពូលជាមួយ លោក ពូទីន នាថ្ងៃនេះ គឺជាការរំលឹកយ៉ាងច្បាស់ដល់លោក ពូទីន អំពីការព្រួយបារម្ភយ៉ាងខ្លាំងរបស់ទ្វីបអាហ្វ្រិក ចំពោះផលប៉ះពាល់ នៃសង្រ្គាម ជាពិសេសលើតម្លៃស្បៀងអាហារ។

ប្រធានាធិបតីកុងហ្គោ លោក Denis Sassou Nguesso បានប្រាប់ លោក ពូទីន និងមេដឹកនាំអាហ្វ្រិក នៅទីក្រុង St. Petersburg ថា «គំនិតផ្តួចផ្តើមរបស់អាហ្វ្រិក (ផែនការសន្តិភាព) សមនឹងទទួលបានការយកចិត្តទុកដាក់បំផុត ហើយវាមិនគួរត្រូវបានបោះបង់ចោលឡើយ»។ លោក​បាន​ថ្លែង​តាម​រយៈ​អ្នក​បក​ប្រែ​ថា​ «យើង​កំពុង​តែ​អំពាវនាវ​ជា​បន្ទាន់​ម្តង​ទៀត ​ឲ្យ​មាន​ការ​ស្ដារ​សន្តិភាព​នៅ​អឺរ៉ុប»។

ប្រធានាធិបតីអេហ្ស៊ីប លោក Abdel Fattah El-Sisi បានជំរុញឱ្យរុស្ស៊ីស្តារឡើងវិញ នូវកិច្ចព្រមព្រៀងគ្រាប់ធញ្ញជាតិសមុទ្រខ្មៅ ដែលទីក្រុងម៉ូស្គូបដិសេធមិនបន្តវាកាលពីសប្តាហ៍មុន។ លោក Sisi បាននិយាយដូច្នេះថា «ចាំបាច់​ដើម្បី​ឈាន​ដល់​កិច្ចព្រមព្រៀង​មួយ» ដើម្បីធ្វើឱ្យ​រស់ឡើងវិញ​នៃ​កិច្ចព្រមព្រៀង​នេះ។

លោក ពូទីន បានឆ្លើយតបថា ការឡើងថ្លៃម្ហូបអាហារពិភពលោក គឺជាលទ្ធផលនៃកំហុសគោលនយោបាយរបស់លោកខាងលិច តាំងពីយូរយារណាស់មកហើយ មុនពេលសង្រ្គាមអ៊ុយក្រែនទៅទៀត។

លោក ពូទីន បានសង្កត់ធ្ងន់ថា ប្រទេសរុស្ស៊ីបានដកខ្លួនចេញពីកិច្ចព្រមព្រៀងសមុទ្រខ្មៅកាលពីសប្តាហ៍មុន ដោយសារតែកិច្ចព្រមព្រៀងនេះ មិនបាននាំយកស្បៀងអាហារដល់ប្រទេសក្រីក្រពិតប្រាកដឡើយ។

គួរបញ្ជាក់ថា ចាប់តាំងពីរុស្ស៊ីដកខ្លួនចេញពីកិច្ចព្រមព្រៀងមក រុស្ស៊ីបានទម្លាក់គ្រាប់បែកម្តងហើយម្តងទៀតលើកំពង់ផែ និងឃ្លាំងគ្រាប់ធញ្ញជាតិរបស់អ៊ុយក្រែន ដែលបណ្តាលឱ្យអ៊ុយក្រែន និងលោកខាងលិចចោទប្រកាន់ថា រុស្ស៉ីបានប្រើប្រាស់ស្បៀងអាហារជាចំណាត់ខ្មាំងសង្គ្រាម ខណៈដែលតម្លៃស្បៀងអាហារពិភពលោកបានកើនឡើងម្តងទៀត៕