(វ៉ាសូវី)៖ រដ្ឋមន្រ្តីមហាផ្ទៃប៉ូឡូញ បាននិយាយកាលពីថ្ងៃព្រហស្បតិ៍សប្តាហ៍នេះថា ប៉ូឡូញ​ លីទុយអានី និងឡេតូនី អាចនឹងសម្រេចចិត្តរួមគ្នា ដើម្បីបិទព្រំប្រទល់របស់ប្រទេសទាំង៣ ជាមួយសម្ព័ន្ធមិត្តដ៏ជិតស្និទ្ធរបស់រុស្ស៉ីគឺបេឡារុស ប្រសិនបើឧប្បត្តិហេតុធ្ងន់ធ្ងរណាមួយកើតឡើង ពាក់ព័ន្ធក្រុមទាហានស៉ីឈ្នួលរុស្ស៉ី Wagner នៅតាមបណ្តោយព្រំដែនរបស់ពួកគេ ជាមួយប្រទេសបេឡារុស។ នេះបើតាមការចេញផ្សាយ ដោយទីភ្នាក់ងារព័ត៌មាន AFP នៅថ្ងៃសុក្រ ទី២៨ ខែកក្កដា ឆ្នាំ២០២៣។

រដ្ឋមន្រ្តីមហាផ្ទៃប៉ូឡូញ លោក ម៉ារីយូស កាមីនស្គី (Mariusz Kaminski) បាននិយាយយ៉ាងដូច្នេះថា «ប្រាកដណាស់ ប្រសិនបើមាន​ឧប្បត្តិហេតុធ្ងន់ធ្ងរណាមួយពាក់ព័ន្ធនឹងក្រុម Wagner កើតឡើងនៅបណ្តោយព្រំប្រទល់ នៃបណ្តាប្រទេសជាសមាជិករបស់អង្គការណាតូ (NATO) និងសហភាពអឺរ៉ុប (EU) ដូចជាប៉ូឡូញ លីទុយអានី ឬឡេតូនី ជាដើមនោះ យើងច្បាស់ជានឹងចាត់វិធានការរួមគ្នាពុំខានឡើយ។ ខ្ញុំ​មិនបដិសេធនោះទេ នូវលទ្ធភាពដែលពួកយើងនឹងឆ្លើយតប តាមរយៈការបិទខ្ទប់បេឡារុសឱ្យនៅឯកោទាំងស្រុង»។

គួរបញ្ជាក់ថា កាលពីថ្ងៃទី១៧ ខែកក្កដា ​ប៉ូឡូញបានសម្រេចផ្លាស់ទីកងអង្គភាពយោធារបស់ខ្លួន ទៅប្រមូលផ្តុំនៅភាគខាងកើតប្រទេស បន្ទាប់ពី​ក្រុម Wagner បានចាប់ផ្តើមបណ្តុះបណ្តាលកងកម្លាំងពិសេសរបស់បេឡារុស នៅមិនឆ្ងាយប៉ុន្មានពីព្រំប្រទល់របស់ប៉ូឡូញ។ ២ថ្ងៃក្រោយ ប្រធានាធិបតីរុស្ស៉ីលោក វ៉្លាឌីមៀ ពូទីន ក៏បានចោទប្រកាន់ថា ប៉ូឡូញមានមហិច្ឆតាចង់បានទឹកដីបេឡារុស ដែលធ្លាប់ជាផ្នែកនៃអតីតសហភាពសូវៀត ហើយលោកបានព្រមានថា ទង្វើឈ្លានពានក្នុងទម្រង់ណាមួយ ប្រឆាំងលើបេឡារុស នឹងត្រូវចាត់ទុកជាការវាយប្រហារលើរុស្ស៉ីតែម្តង។

គួរបញ្ជាក់ថា ប៉ូឡូញគឺជាកន្លែងជ្រកកោនដ៏សំខាន់ នៃក្រុមអ្នកនយោបាយដែលប្រឆាំងប្រធានាធិបតីបេឡារុស លោក អាឡិចសាដឺ លូកាសិនកូ (Alexander Lukashenko) ហើយទីក្រុងវ៉ាសូវីក៏ជាអ្នកគាំទ្រដ៏រឹងមាំបំផុតមួយរបស់ទីក្រុងកៀវផងដែរ គិតចាប់តាំងពី​រុស្ស៉ីបានចូលឈ្លានពានអ៊ុយក្រែន កាលពីឆ្នាំ២០២២មក៕