(ព័រម៉ូរេសប៊ី)៖ រដ្ឋមន្រ្តីការពារជាតិអាមេរិក លោក ឡយ អូស្ទីន (Lloyd Austin) បាននិយាយនាថ្ងៃព្រហស្បតិ៍នេះថា ទីក្រុងវ៉ាស៉ីនតោនមិនមែនកំពុងព្យាយាមស្វែងរក ការបង្កើតមូលដ្ឋានអចិន្ត្រៃយ៍​ នៅក្នុងប្រទេសប៉ាពូអាស៉ីនូវែលហ្គីណេ (PNG) នៃតំបន់មហាសមុទ្រប៉ាស៉ីហ្វិក នោះឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៧ ខែកក្កដា ឆ្នាំ២០២៣។

លោករដ្ឋមន្រ្តីការពារជាតិអាមេរិក បានថ្លែងដូចខាងលើ ខណៈដែលរូបលោកកំពុងបំពេញទស្សនកិច្ច នៅប្រទេសដែនកោះប៉ាស៉ីហ្វិកមួយនេះ។ លោក អូស្ទីន បានជួបជាមួយនាយករដ្ឋមន្រ្តី PNG គឺលោក ​ជែម ម៉ារ៉ាប៉េ (James Marape) ដើម្បីពិភាក្សាអំពីការធ្វើឱ្យទំនាក់ទំនង​ការពារជាតិរវាងប្រទេសទាំងពីរ មានភាពស៉ីជម្រៅជាងមុន។

លោក អូស្ទីន បានប្រាប់ក្រុមអ្នកសារព័ត៌មានយ៉ាងដូច្នេះថា «ខ្ញុំចង់បញ្ជាក់ឱ្យច្បាស់ជាថ្មីថា ពួកយើងមិនមែនកំពុងព្យាយាមបង្កើតមូលដ្ឋាន​អចិន្រ្តៃយ៍នៅ​ PNG ឡើយ»។ លោកប្រមុខការពារជាតិអាមេរិកបានបន្តថា ប្រទេសទាំងពីរកំពុងព្យាយាមពង្រឹងទំនាក់ទំនងការពារជាតិដែលមានស្រាប់ ហើយអាមេរិកនឹងជួយធ្វើទំនើបកម្ម កងកម្លាំងការពារជាតិរបស់ PNG ព្រមទាំងបង្កើនសមត្ថភាពធ្វើប្រតិបត្តិការរួមគ្នា។

កាលពីខែឧសភា​ ឆ្នាំនេះ​ សហរដ្ឋអាមេរិក និង PNG បានចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការផ្នែក​ការពារជាតិ ដែលកំណត់ក្របខណ្ឌសម្រាប់ឱ្យ សហរដ្ឋអាមេរិកជួយកែលម្អកំពង់ផែនិងអាកាសយានដ្ឋាន សម្រាប់គោលដៅប្រើប្រាស់ទាំង​យោធានិងស៉ីវិល។ ខ្លឹមសារក្នុងកិច្ចព្រមព្រៀងនោះ ក៏អនុញ្ញាតឱ្យអាមេរិក អាចប្រមូលផ្តុំកងទ័ពនិងបរិក្ខារយោធានៅ PNG ផងដែរ ហើយ​វាគ្របដណ្តប់លើមូលដ្ឋានយោធាជើងទឹក ឡុមប៊្រូម (Lombrum) ដែលកំពុងស្ថិតក្រោមការអភិវឌ្ឍ ដោយអូស្រ្តាលីនិងអាមេរិក។

គួរបញ្ជាក់ថា សហរដ្ឋអាមេរិក ក៏ដូចជាក្រុមសម្ព័ន្ធមិត្តរបស់ខ្លួន កំពុងប្រឹងព្យាយាមទប់ស្កាត់កុំឱ្យ ក្រុមប្រទេសដែនកោះនៅតំបន់ប៉ាស៉ីហ្វិក នាំគ្នាទៅបង្កើតចំណងទាក់ទងផ្នែកសន្តិសុខជាមួយចិន ដែលកំពុងតែកើនឡើងឥទ្ធិពលនៅឥណ្ឌូ-ប៉ាស៉ីហ្វិក ​និងបន្ទាប់ពីទីក្រុងប៉េកាំងបាន​ចុះកិច្ចព្រមព្រៀងសន្តិសុខមួយ ជាមួយប្រទេសសូឡូម៉ុនកាលពីឆ្នាំមុន៕