(ឌីលី)៖ សិង្ហបុរី គ្រោងនឹងបើកស្ថានទូតនៅក្នុងទីក្រុង Dili រដ្ឋធានី នៃប្រទេសទីម័រខាងកើត នៅក្នុងអ្វីដែលរដ្ឋមន្ត្រីការបរទេសសិង្ហបុរី លោក Vivian Balakrishnan បានហៅថាជា «ព្រឹត្តិការណ៍សំខាន់» ក្នុងទំនាក់ទំនងទ្វេភាគី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី២៥ ខែកក្កដា ឆ្នាំ២០២៣។

លោក Balakrishnan បានប្រកាសគម្រោងនេះ នៅក្នុងសន្និសីទសារព័ត៌មានរួមគ្នាជាមួយសមភាគីទីម័រ Benedetto dos Santos Freitas ដែលធ្វើឡើងនៅទីក្រុង Dili នៅថ្ងៃចន្ទសប្តាហ៍នេះ។

នាឱកាសនោះ លោកបាននិយាយដូច្នេះថា «នៅពេលដែលពួកគេបន្តវិវឌ្ឍជាប្រទេសមួយ និងជាប្រជាជាតិមួយ ជាពិសេសនៅពេលពួកគេចូលជាសមាជិកអាស៊ាន យើងជឿថាវាជាពេលវេលាដ៏ត្រឹមត្រូវក្នុងការបង្កើតស្ថានទូត ដែលជាចំណុចស្នូលសម្រាប់កិច្ចសហប្រតិបត្តិការរបស់យើង សម្រាប់ការគាំទ្ររបស់យើង និងសម្រាប់ឱកាសរួមគ្នានាពេលអនាគត»។

សេចក្តីថ្លែងការណ៍​របស់​ក្រសួងការបរទេស​សិង្ហ​បុរី​បាន​បញ្ជាក់ថា វិស័យ​នៃ​កិច្ចសហប្រតិបត្តិការ​ រួមមានដូចជា​ការវិនិយោគ ទេសចរណ៍ ការពារជាតិ និង​ថាមពល​ជាដើម។ មេដឹកនាំ​ទីម័រ​ខាងកើត បាន​ស្វាគមន៍​ចំពោះ​ការ​គ្រោង​​បើក​ស្ថាន។

គួរបញ្ជាក់ថា សិង្ហបុរីនឹងក្លាយជាប្រទេសអាស៊ានទី៦ ដែលបើកស្ថានទូតនៅទីម័រខាងកើតដែលមានប្រជាជនប្រមាណជាង ១.៣លាននាក់មួយ។ ប្រទេស​អាស៊ាន​ផ្សេង​ទៀត​ដែល​មាន​បេសកកម្ម​នៅ​ក្រុង​ឌីលី មាន​ប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន និង​ថៃ៕