(ព្យុងយ៉ាង)៖ កូរ៉េខាងជើងក្នុងសប្តាហ៍នេះ នឹងទទួលស្វាគមន៍រដ្ឋមន្រ្តីការពារជាតិរុស្ស៉ី និងគណៈប្រតិភូជាន់ខ្ពស់ចិន នៅឯទីក្រុងព្យុងយ៉ាង សម្រាប់ឱកាសអបអរខួប នៃការចុះបទឈប់បាញ់សង្រ្គាមកូរ៉េ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី២៥ ខែកក្កដា ឆ្នាំ២០២៣។

ទីភ្នាក់ងារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃអង្គារនេះថា «គណៈ​ប្រតិភូយោធានៃសហព័ន្ធរុស្ស៉ី ដែលដឹកនាំដោយ​រដ្ឋមន្រ្តីការពារជាតិរុស្ស៉ី លោក សឺហ្គៃ សូយហ្គូ (Sergei Shoigu) នឹងបំពេញទស្សនកិច្ចអបអរសាទរ មកកាន់ប្រទេសកូរ៉េខាងជើង»។ រីឯក្រសួងការពារជាតិរុស្ស៉ីវិញ បាននិយាយក្នុងសេចក្តីថ្លែងការណ៍ដូច្នេះថា «ទស្សនកិច្ចនេះនឹងចូលរួមពង្រឹង ទំនាក់ទំនងយោធាថែមទៀត​រវាងរុស្ស៉ីនិងកូរ៉េខាងជើង ហើយវានឹងជាការបោះជំហានសំខាន់មួយ ក្នុងការអភិវឌ្ឍកិច្ចសហប្រតិបត្តិការ រវាងប្រទេសទាំងពីរ»។ ចំណែក​ កាលពីថ្ងៃចន្ទ KCNA បានរាយការណ៍ថា សមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តចិន លោក លី ហុងចុង (Li Hongzhong) ក៏នឹងដឹកនាំគណៈប្រតិភូជាន់ខ្ពស់ចិន ធ្វើដំណើរទស្សនកិច្ចមកកាន់កូរ៉េខាងជើង ក្នុងសប្តាហ៍នេះផងដែរ។

គួរបញ្ជាក់ថា ដំណើរបំពេញទស្សនកិច្ចរបស់ក្រុមមន្រ្តីជាន់ខ្ពស់ចិននិងរុស្ស៉ីខាងលើ គឺដើម្បីមកចូលរួមព្រឹត្តិការណ៍នៅទីក្រុងព្យុងយ៉ាង នាឱកាស​ខួបទី៧០ គិតចាប់តាំងពីការចុះហត្ថលេខាលើបទឈប់បាញ់សង្រ្គាមកូរ៉េ ដែលនៅកូរ៉េខាងជើង ត្រូវចាត់ទុកជាទិវាជ័យជម្នះ។ ក្នុងចំណោម​ព្រឹត្តិការណ៍ចម្រុះជាច្រើន ការធ្វើព្យុហយាត្រាយោធាទ្រង់ទ្រាយធំ ក៏ត្រូវគេរំពឹងថា នឹងប្រារព្ធឡើងផងដែរ ក្នុងសប្តាហ៍នេះ។ សង្រ្គាមនៅឧបទ្វីបកូរ៉េ បានផ្ទុះឡើងកាលពីថ្ងៃទី២៥ ខែមិថុនា ឆ្នាំ១៩៥០ ហើយបិទបញ្ចប់ទៅវិញនៅថ្ងៃទី២៧ ខែកក្កដា ឆ្នាំ១៩៥៣ តាមរយៈបទឈប់បាញ់ គឺមិនមែនសន្ធិសញ្ញាសន្តិភាពទេ។ វាមានន័យថា បើតាមបច្ចេកទេស ប្រទេសកូរ៉េទាំងពីរ គឺបន្តស្ថិតក្នុងស្ថានភាពមានសង្រ្គាមជាមួយគ្នានៅឡើយ មកទល់សព្វថ្ងៃ៕