(វ៉ាស៊ីនតោន)៖ រដ្ឋមន្ត្រីការបរទេសអាមេរិក លោក Antony Blinken បាននិយាយថាខណៈអ៊ុយក្រែនដណ្ដើមបានមកវិញនូវទឹកដី៥០ភាគរយ ដែលរុស្ស៉ីបានដណ្ដើមកាន់កាប់ ក្នុងសង្រ្គាមឈ្លានពានរបស់ខ្លួន ទីក្រុងកៀវ កំពុងប្រឈមមុខនឹងការប្រយុទ្ធដ៏លំបាក ដើម្បីទទួលបានជ័យជម្នះបន្ថែមទៀត។ នេះបើតាមការចេញផ្សាយដោយទីភ្នាក់ងារ សារព័ត៌មាន AFP នៅថ្ងៃចន្ទ ទី២៤ ខែកក្កដា ឆ្នាំ២០២៣។

ការកត់សម្គាល់ខាងលើរបស់លោក Antony Blinken ធ្វើឡើងនៅក្នុងបទសម្ភាសន៍ជាមួយទូរទស្សន៍ CNN កាលពីថ្ងៃអាទិត្យចុងសប្ដាហ៍កន្លងទៅនេះ។ ថ្លែងនាឱកាសនោះ ប្រមុខការទូតអាមេរិករូបនេះ បានគូសបញ្ជាក់ដូច្នេះថា «ទឹកដី៥០ភាគរយដែលត្រូវបានរឹបអូស (ក្នុងការឈ្លានពាន) ត្រូវបានដណ្ដើមយកមកវិញ...តែវាពិតជាលំបាក ហើយ លទ្ធផលនឹងមិនអាចសម្រេចបាននៅសប្ដាហ៍ក្រោយ ឬ ២សប្ដាហ៍ខាងមុខនោះទេ។ យើងនៅតែត្រូវទន្ទឹងរង់ចាំមើល ហើយខ្ញុំគិតថាអាចច្រើនខែទៅមុខទៀត»។

ដោយឡែក នៅពេលត្រូវបានសាកសួរថាតើអ៊ុយក្រែននឹងទទួលបានយន្ដហោះចម្បាំង F-16 ផលិតដោយសហរដ្ឋអាមេរិក ដែរឬទេ? លោក Blinken បានឆ្លើយថាអ៊ុយក្រែន នឹងទទួលបានយន្ដហោះចម្បាំងនេះ។​

គួរបញ្ជាក់ថា កាលពីចុងខែមិថុនាកន្លងទៅ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានទទួលស្គាល់ថាភាពជឿនលឿននៃប្រតិបត្តិការវាយបករបស់អ៊ុយក្រែន គឺមានភាពយឺតយ៉ាវជាងការរំពឹងទុក ខណៈប្រធានាធិបតីរុស្ស៉ី លោក ពូទីន បានព្រលយសម្ដីថាប្រតិបត្តិការវាយបករបស់ទីក្រុងកៀវបានបរាជ័យទៅហើយ៕