(​អាថែន)៖ ភ្លើង​ឆេះ​ព្រៃ​ដែល​កំពុង​ឆាបឆេះយ៉ាងសន្ធោសន្ធៅ​លើ​កោះ Rhodes របស់​ក្រិក ​បាន​បង្ខំ​អ្នក​ទេសចរ និង​អ្នក​រស់នៅលើកោះ​រាប់​ម៉ឺន​នាក់ ស្វែងរកទីមានសុវត្ថិភាព បន្ទាប់​ពី​ពួកគេត្រូវ​បាន​ជម្លៀស​ចេញ​ពី​ភូមិ និង​រមណីយដ្ឋាន​ឆ្នេរ​សមុទ្រ ​កាល​ពីយប់​ថ្ងៃ​សៅរ៍សប្តាហ៍នេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី២៣​ ខែកក្កដា ឆ្នាំ២០២៣។

អាជ្ញាធរក្រិកបានឱ្យដឹងថា មនុស្សប្រមាណជាង ១៩,០០០ នាក់ត្រូវបានជម្លៀសទៅកាន់ទីសុវត្ថិភាព ក្នុងនោះមានជាង ១៦,០០០នាក់ត្រូវបានជម្លៀសតាមផ្លូវគោក និងជាង ៣,០០០តាមផ្លូវសមុទ្រទៅកាន់កោះផ្សេង នៅក្នុងអ្វីដែលខ្លួនពិពណ៌នាថា ជា «ការជម្លៀសភ្លើងឆេះព្រៃដ៏ធំបំផុតមិនធ្លាប់មាន» នៅក្នុងប្រវត្តិសាស្ត្រក្រិក។

ប្រភពដដែលបានឱ្យដឹងទៀតថា ភ្លើងបានឆេះរាលដាលដល់ភូមិប្រជាជននៅមាត់សមុទ្រដូចជា ភូមិ Kiotari, Gennadi, Peki, Lindos, Lados និង Kalathos ព្រមទាំងសណ្ឋាគាផងដែរ។ ហ្វូងមនុស្សដ៏ច្រើនបានប្រមូលផ្តុំគ្នានៅតាមដងផ្លូវក្រោមផ្ទៃមេឃអួរអាប់ដោយផ្សែង រង់ចាំការប្រញាប់ប្រញាល់ទៅកាន់កន្លែងសុវត្ថិភាព។

ក្រុមហ៊ុនទេសចរណ៍ធំៗដូចជា Jet2, TUI និង Correndon បានលុបចោលជើងហោះហើរទាំងអស់របស់ពួកគេទៅកាន់កោះនេះ ខណៈដែលក្រុមអ្នកពន្លត់អគ្គីភ័យបានព្រមានថា ប្រតិបត្តិការពន្លត់អគ្គីភ័យនេះនឹងត្រូវការពេលវេលាជាច្រើនថ្ងៃទៀត និងមានការលំបាកខ្លាំងដោយសារកត្តាអាកាសធាតុ និងភូមិសាស្ត្រ។

ទោះជាយ៉ាងណា មិន​ទាន់​មាន​សេចក្តីរាយការណ៍​ពី​មនុស្ស​ស្លាប់ ​ដោយសារ​អគ្គិភ័យ​នេះ​នៅឡើយ​ទេ។

គួរបញ្ជាក់ថា ភើងឆេះព្រៃនៅលើកោះនេះ បានចាប់ផ្តើមជិតមួយសប្តាហ៍មកហើយ ប៉ុន្តែអាជ្ញាមិនអាចទប់ស្កាត់បាន។ កោះ Rhodes គឺស្ថិត​នៅ​ភាគ​អាគ្នេយ៍​ប្រទេស​ក្រិក។ កោះ​នេះ​មាន​ការ​ពេញ​និយម​ពី​អ្នក​ដើរ​កម្សាន្ត​ឆ្នេរ និង​ជាកន្លែង​ប្រវត្តិសាស្ត្រផងដែរ៕