(វ៉ាស៉ីនតោន)៖ ក្រុមមន្រ្តីអាមេរិក បានបង្ហើបឱ្យដឹងកាលពីថ្ងៃសុក្រសប្តាហ៍នេះថា សហរដ្ឋអាមេរិកគ្រោងធ្វើសេចក្តីប្រកាសបើឆាប់បំផុត គឺនៅថ្ងៃអង្គារសប្តាហ៍ក្រោយ ស្តីអំពីការផ្តល់កញ្ចប់ជំនួយយោធាថ្មីទៀតសម្រាប់អ៊ុយក្រែន ដែលមានទំហំ៤០០លានដុល្លារ។ នេះបើតាម​ការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី២២ ខែកក្កដា ឆ្នាំ២០២៣។

សម្ភារដែលត្រូវផ្តល់ក្នុងកញ្ចប់ជំនួយយោធាខាងលើ រួមមានរថពាសដែក Stryker ប៉ុន្មានគ្រឿង, ឧបករណ៍បោសសំអាតមីន, គ្រាប់មីស៉ីលសម្រាប់ប្រព័ន្ធការពារដែនអាកាស NASAMS, គ្រាប់រ៉ុក្កែតសម្រាប់ប្រព័ន្ធបាញ់ផ្លោង HIMARS, អាវុធប្រឆាំងរថក្រោះដូចជា TOW និង Javelin ហើយនិងគ្រាប់សម្រាប់ប្រព័ន្ធប្រឆាំងមីស៉ីលនិងយន្តហោះ Patriot និង Stinger។ យ៉ាងណាមិញ អាមេរិកនឹងមិនបញ្ចូល​គ្រាប់បែកចង្កោម ក្នុងកញ្ចប់ជំនួយសព្វាវុធនេះឡើយ។

គួរបញ្ជាក់ថា ទីក្រុងវ៉ាស៉ីនតោន បានផ្តល់គ្រាប់បែកចង្កោមប្រភេទ DPICM ដែលបាញ់ចេញពីប្រព័ន្ធកាំភ្លើងធំហោវីតសឺ (howitzer) ប្រភេទ១៥៥មីលីម៉ែត្រ ឱ្យអ៊ុយក្រែន កាលពីពេលកន្លងទៅ ក្នុងខែកក្កដានេះ។ កញ្ចប់ជំនួយយោធាខាងលើ នឹងជាកញ្ចប់ទី៤៣ហើយ ដែលសហរដ្ឋអាមេរិកបានអនុម័តសម្រាប់អ៊ុយក្រែន គិតចាប់តាំងពីការឈ្លានពានរបស់រុស្ស៉ី ដែលបានចាប់ផ្តើមកាលពីខែកុម្ភៈ ឆ្នាំ២០២២ ដោយគិតជាទំហំទឹកប្រាក់សរុបគឺច្រើនជាង ៤១ពាន់លានដុល្លារ៕