(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃសុក្រសប្តាហ៍នេះ បានសម្រេចដកហូតតំណែងលោក វ៉ាឌីម ព្រីស្តៃកូ (Vadym Prystaiko) ជាឯកអគ្គរដ្ឋទូតអ៊ុយក្រែនប្រចាំចក្រភពអង់គ្លេស បន្ទាប់ពីមន្រ្តីទូតជាន់ខ្ពស់រូបនោះ បាននិយាយរិះគន់​លើលោកប្រធានាធិបតីអ៊ុយក្រែន ជាសាធារណៈ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី២២ ខែកក្កដា ឆ្នាំ២០២៣។

ក្នុងបទសម្ភាសន៍មួយជាមួយសារព័ត៌មាន Sky News កាលពីសប្តាហ៍មុន លោក Prystaiko ត្រូវបានសាកសួរអំពីអត្ថាធិប្បាយរបស់ រដ្ឋមន្រ្តីការពារជាតិអង់គ្លេស លោក បេន វ៉លលែស (Ben Wallace) ដែលចង់ឱ្យទីក្រុងកៀវបង្ហាញការដឹងគុណជាងមុន សម្រាប់កិច្ច​ប្រឹងប្រែងជួយផ្តល់ជំនួយជាសព្វាវុធ ពីសំណាក់ក្រុមសម្ព័ន្ធមិត្តលោកខាងលិច សម្រាប់យកទៅប្រយុទ្ធតតាំង ជាមួយកងកម្លាំងឈ្លានពាន​របស់រុស្ស៉ី។

ជាការឆ្លើយតបលោក ហ្សេលេនស្គី បាននិយាយថា អ៊ុយក្រែនតែងតែដឹងគុណចក្រភពអង់គ្លេសជានិច្ច ដែលជាសម្ព័ន្ធមិត្តដ៏រឹងមាំមួយ។ បើតាមការស្រង់សម្តីដោយប្រព័ន្ធផ្សព្វផ្សាយនៅអង់គ្លេស លោកប្រធានាធិបតីអ៊ុយក្រែន ថែមទាំងបាននិយាយទៀតថា លោក Wallace គួរតែជួយណែនាំពីរបៀបដែលលោក ហ្សេលេនស្គី គួរតែបង្ហាញការដឹងគុណ ឬក៏អាចឱ្យលោកត្រូវងើបឡើងរាល់ព្រឹក ហើយបង្ហាញ​ពាក្យអរគុណដល់ លោករដ្ឋមន្រ្តីការពារជាតិអង់គ្លេស តែម្តង។

ពេលត្រូវបានសាកសួរថា តើការឆ្លើយតបរបស់លោក ហ្សេលេនស្គី ហាក់មានន័យបង្កប់បែបឌឺដងឬយ៉ាងណានោះ លោក Prystaiko បានប្រាប់សារព័ត៌មាន Sky News ថា គឺមានបង្កប់តិចតួចពិតមែន ត្រង់កន្លែងលោក ហ្សេលេនស្គី និយាយថា ពេលលោកក្រោកពីដំណេករៀងរាល់ព្រឹក​ គឺលោកនឹងទូរស័ព្ទទៅកាន់លោក Ben Wallace ដើម្បីអរគុណ។ លោក Prystaiko បានបន្ថែមដូច្នេះទៀតថា «ខ្ញុំមិនជឿថាការនិយាយបង្កប់ន័យឌឺដងបែបនេះ គឺជារឿងមួយដែលល្អឡើយ ខណៈយើងត្រូវបង្ហាញឱ្យរុស្ស៉ី​ឃើញច្បាស់ថា ពួកយើងកំពុងធ្វើការជាមួយគ្នា»។

គួរបញ្ជាក់ថា ក្នុងបទបញ្ជារបស់លោក ហ្សេលេនស្គី ដែលបង្គាប់ឱ្យបញ្ឈប់តួនាទីលោក Prystaiko គឺមិនមានភ្ជាប់ហេតុផលអ្វីនោះទេ។ ម៉្យាងវិញទៀត វាក៏មិនមានការប្រកាសឈ្មោះអ្នកដែលនឹងត្រូវជំនួសលោកដែរ។ លោក Prystaiko វ័យ៥៣ឆ្នាំ គឺជាអ្នកការទូតមាន​បទពិសោធន៍ម្នាក់ និងជាអតីតឧបនាយករដ្ឋមន្រ្តីអ៊ុយក្រែន ដែលបានកាន់តំណែងជាឯកអគ្គរដ្ឋទូតអ៊ុយក្រែននៅចក្រភពអង់គ្លេស អស់រយៈពេល៣ឆ្នាំមកហើយ៕