(ប៉េកាំង)៖ ឯកអគ្គរដ្ឋទូតចិនប្រចាំទីក្រុងវ៉ាស៉ីនតោន បាននិយាយកាលពីថ្ងៃពុធសប្តាហ៍នេះថា វាគឺជាអាទិភាពមួយរបស់ចិន ក្នុងការរារាំង​កុំឱ្យមេដឹកនាំរងកោះតៃវ៉ាន់ គឺលោក វីលៀម ឡៃ (William Lai) ទៅបំពេញទស្សនកិច្ចនៅឯសហរដ្ឋអាមេរិក នាខែសីហាខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២០ ខែកក្កដា ឆ្នាំ២០២៣។

លោក William នឹងត្រូវបំពេញទស្សនកិច្ចទៅកាន់ប្រទេសប៉ារ៉ាហ្កាយ ដើម្បីចូលរួមពិធីស្បថចូលកាន់តំណែងរបស់ប្រធានាធិបតីថ្មីនៃ​ប្រទេសអាមេរិកឡាទីនមួយនេះ នៅថ្ងៃទី១៥​ ខែសីហា ហើយក្នុងឱកាសនោះ លោកនឹងឆ្លៀតចូលបំពេញទស្សនកិច្ចនៅសហរដ្ឋអាមេរិក នៅតាមផ្លូវទៅឬក៏មកពីប៉ារ៉ាហ្កាយវិញ។ ផែនការនេះបានធ្វើឱ្យមានការមិនពេញចិត្ត ពីសំណាក់ទីក្រុងប៉េកាំង ដែលបានរិះគន់លោក ឡៃ ថាជាជនចង់បំបែករដ្ឋ ដ្បិតកោះតៃវ៉ាន់ត្រូវចិនចាត់ទុកត្រឹមជា ផ្នែកនៃដែនដីរបស់ខ្លួនប៉ុណ្ណោះ។ ក្រៅពីមានតួនាទីជា មេដឹកនាំរងតៃវ៉ាន់ លោក ឡៃ ក៏ជាបេក្ខជនរបស់គណបក្សកំពុងកាន់អំណាច DPP សម្រាប់ការបោះឆ្នោតជ្រើសរើសសមាជិកភានិងមេដឹកនាំតៃវ៉ាន់ នៅខែមករា ឆ្នាំក្រោយផងដែរ ហើយលោកទទួលបានសំឡេងគាំទ្រនាំមុខគ្នា ក្នុងការស្ទង់មតិភាគច្រើន។

ឯកអគ្គរដ្ឋទូតចិនប្រចាំសហរដ្ឋអាមេរិក លោក សៀ ហ្វឹង (Xie Feng) បានលើកឡើងថា តៃវ៉ាន់គឺជាតៃវ៉ាន់របស់ចិន ហើយប្រទេសចិនចង់ឱ្យមានការបង្រួបបង្រួមគ្នាវិញ ដោយសន្តិវិធី ប៉ុន្តែពួកចង់ផ្តាច់ខ្លួននៅតៃវ៉ាន់ កំពុងប៉ុនប៉ងសម្រេចគោលដៅរបស់ពួកគេ ដោយព្យាយាមទៅស្វែងរកការគាំទ្រពីសហរដ្ឋអាមេរិក។ លោក សៀ បានសង្កត់ធ្ងន់យ៉ាងដូច្នេះថា «អាទិភាពសម្រាប់យើងនាពេលឥឡូវនេះ គឺការរារាំង​លោក Lai កុំឱ្យបំពេញទស្សនកិច្ចនៅអាមេរិក»។

គួរបញ្ជាក់ថា កាលពីខែសីហា ឆ្នាំ២០២២ និងខែមេសា ឆ្នាំនេះ ចិនបានធ្វើសមយុទ្ធយោធាទ្រង់ទ្រាយធំ នៅជុំវិញកោះតៃវ៉ាន់ ក្រោយ​ខឹងសម្បារព្រោះតែ ការបំពេញទស្សនកិច្ចកាលពីខែសីហា នៅកោះតៃវ៉ាន់ ដោយអតីតប្រធានសភាតំណាងរាស្រ្តអាមេរិក លោកស្រី ណាស៉ី ផេឡូស៉ី (Nancy Pelosi) ខណៈកាលពីខែមេសា មេដឹកនាំតៃវ៉ាន់ លោកស្រី សៃ អ៉ីងវិន (Tsai Ing Wen) បានជួបជាមួយ ប្រធានសភាតំណាងរាស្រ្តអាមេរិកបច្ចុប្បន្ន គឺលោក ខេវិន ម៉ាក់ខាធី (Kevin McCarthy) នៅទីក្រុងឡូសអាន់ជេលែស ពេលលោកស្រី ត្រឡប់មកពីបំពេញទស្សនកិច្ច នៅតំបន់អាមេរិកកណ្តាលវិញ៕