(មូស្គូ)៖ វិមានក្រឹមឡាំងបានចោទប្រកាន់លោកខាងលិចថា បានបិទភ្នែកបិទត្រចៀកចំពោះ «ការវាយប្រហារភេរវកម្ម» ដែលធ្វើឡើងដោយអ៊ុយក្រែននៅលើដីរុស្ស៊ី ដោយបានកត់សម្គាល់នៅថ្ងៃពុធ (១៩កក្កដា) ថា ប្រទេសលោកខាងលិចនៅស្ងៀមស្ងាត់ ចំពោះការវាយប្រហារដ៏សាហាវនៅលើស្ពានកៀវ ក្នុងសប្តាហ៍នេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃពុធ​ ទី១៩ ខែកក្កដា ឆ្នាំ២០២៣។

ទីក្រុងមូស្គូបាននិយាយថា អ៊ុយក្រែនបានប្រើប្រាស់ទូកគ្មានមនុស្សបើករបស់កងទ័ពជើងទឹក ដើម្បីវាយប្រហារលើស្ពានតភ្ជាប់រុស្ស៊ីទៅកាន់ឧបទ្វីបគ្រីមៀ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានកាលពីថ្ងៃពុធថា វាមិនមែនជាលើកទីមួយទេ ដែលទីក្រុងមូស្គូបានកត់សម្គាល់ឃើញពី​​ មិនអើពើរបស់លោកខាងលិច ក្នុងការថ្កោលទោសអំពើភេរវកម្មរបស់អ៊ុយក្រែន។

យោងតាមប្រព័ន្ធផ្សព្វផ្សាយអ៊ុយក្រែន ទីក្រុងកៀវជាអ្នកនៅពីក្រោយការវាយប្រហារនេះ ប៉ុន្តែមិនទាន់មានការទទួលខុសត្រូវជាផ្លូវការនៅឡើយ។ ក្រុងកៀវបាន​និយាយ​ថា គ្រីមៀជា​កម្មសិទ្ធិ​របស់​អ៊ុយក្រែន ហើយ​មាន​បំណង​ដណ្តើម​យក​វា​វិញ​ដោយ​កម្លាំង ដែល​ជា​ផ្នែក​មួយ​នៃ​កិច្ច​ប្រឹងប្រែង​ ដើម្បី​បណ្តេញ​ទាហាន​រុស្ស៊ី​ចេញ​ពី​ទឹកដី​ខ្លួន។

គួរបញ្ជាក់ថា បើតាមក្រុមមន្ត្រីលើកបន្តុបដោយរុស្ស៉ី ប្ដីប្រពន្ធ ២នាក់ដែលធ្វើដំណើរតាមរថយន្ដនៅលើស្ពានគ្រីមៀ ក្នុងថ្ងៃឈប់សម្រាកកាលពីចុងសប្ដាហ៍កន្លងទៅ ត្រូវបានសម្លាប់នៅក្នុងការវាយប្រហារ រីឯកូនស្រីរបស់ពួកគេមានអាយុ១៤ឆ្នាំ បានរងរបួស៕