(គ្រីមៀ)៖ អភិបាលតំបន់គ្រីមៀ បានឱ្យដឹងនៅថ្ងៃពុធនេះថា គ្រោះអគ្គិភ័យមួយបានកើតឡើង នៅឯមូលដ្ឋានហ្វឹកហ្វឺនយោធាមួយកន្លែង ស្ថិតក្នុងស្រុកគីរ៉ូវស្កេ (Kirovske) នៃឧបទ្វីបគ្រីមៀ ជាហេតុបង្ខំឱ្យអាជ្ញាធរត្រូវចេញបញ្ជាជម្លៀសខ្លួន សម្រាប់ប្រជាជនជាង២,០០០នាក់ ហើយបិទផ្លូវហាយវ៉េមួយខ្សែថែមទៀត ដែលនៅក្បែរនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៩ ខែកក្កដា ឆ្នាំ២០២៣។

អភិបាលតំបន់គ្រីមៀ លោក សឺហ្គៃ អាក់សិននូវ (Sergei Aksyonov) បាននិយាយលើបណ្តាញសង្គម Telegram ថា ដោយសារតែ​ហេតុការណ៍គ្រោះអគ្គិភ័យខាងលើ ប្រជាជននៅតាមសហគមន៍ចំនួន៤ ដែលស្មើនឹងចំនួនជាង២,០០០នាក់ ត្រូវស្ថិតក្រោមការបង្គាប់ឱ្យ​ជម្លៀសខ្លួន ជាបណ្តោះអាសន្ន។ យ៉ាងណាក្តី ពុំមានការផ្តល់មូលហេតុ ដែលបង្កឱ្យមានគ្រោះអគ្គិភ័យនេះឡើយ ខណៈផ្លូវហាយវ៉េ តាវរីឌី (Tavridy) ដែលសំខាន់មួយនៅក្បែរកន្លែងកើតហេតុ ក៏ត្រូវបានបិទផងដែរ។

ដោយឡែក ឆាណែល Telegram រុស្ស៉ីដែលមានទំនាក់ទំនង ជាមួយទីភ្នាក់ងារសន្តិសុខរបស់ប្រទេសរុស្ស៉ី ហើយនិងប្រព័ន្ធផ្សព្វផ្សាយ​របស់អ៊ុយក្រែន បានរាយការណ៍ថា ដេប៉ូស្តុកគ្រាប់រំសេវមួយបានរងការឆាបឆេះ នៅឯមូលដ្ឋានយោធាខាងលើ បន្ទាប់ពីមានការវាយប្រហារ កាលពីពេលយប់ដោយអ៊ុយក្រែន។

គួរបញ្ជាក់ថា អគ្គិភ័យនោះកើតឡើង នៅរយៈពេល២ថ្ងៃ បន្ទាប់ពីហេតុការវាយប្រហារមួយ ដែលបានធ្វើឱ្យខូចខាតស្ពានតភ្ជាប់រវាង​តំបន់ឧបទ្វីបគ្រីមៀ និងប្រទេសរុស្ស៉ី កាលពីថ្ងៃចន្ទសប្តាហ៍នេះ ជាសកម្មភាពដែលទីក្រុងមូស្គូបានទម្លាក់កំហុសលើអ៊ុយក្រែន ហើយ​ប្រធានាធិបតីរុស្ស៉ី លោក វ៉្លាឌីមៀ ពូទីន បានប្តេជ្ញាសងសឹកទៅវិញ។ កាលពីចន្លោះយប់ថ្ងៃអង្គារ-ពុធសប្តាហ៍នេះ រុស្ស៉ីបានបន្តបើកការ​វាយប្រហារតាមផ្លូវអាកាសពីរយប់ជាប់គ្នា លើទីក្រុងកំពង់ផែអូដេសារបស់អ៊ុយក្រែន៕