(អ៊ីស្តង់ប៊ុល)៖ ប្រធានាធិបតីតួកគី លោក Recep Tayyip Erdogan នៅថ្ងៃសុក្រសប្តាហ៍នេះ បានបង្ហាញនូវលទ្ធភាពនៃការគាំទ្របេក្ខភាពអង្គការណាតូរបស់ប្រទេសស៊ុយអែត ដោយនិយាយថា ប្រទេសតួកគីនឹង «ធ្វើការសម្រេចចិត្តល្អបំផុត ដោយមិនគិតពីអ្វីនោះទេ»។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៧ ខែកក្កដា ឆ្នាំ២០២៣។

ការអត្ថាធិប្បាយរបស់លោក Erdogan ខាងលើបានកើតឡើងប៉ុន្មានម៉ោង​ មុនពេលលោកនឹងជួបពិភាក្សាជាមួយប្រធានាធិបតីអ៊ុយក្រែន លោក Volodymyr Zelensky ដែលនឹងផ្តោតសំខាន់លើការលុកលុយរបស់រុស្ស៊ី និងការពង្រីកប្លុកយោធាដែលដឹកនាំដោយសហរដ្ឋអាមេរិក។

តួកគីដែលជាសមាជិកអង្គការណាតូ ដែលបានរារាំងការទទួលស្គាល់ស៊ុយអែតទៅក្នុងសម្ព័ន្ធភាព បានធ្វើឱ្យទីក្រុងវ៉ាស៊ីនតោន និងក្រុងប្រ៊ុចសែលខឹងសម្បារ ខណៈដែលពួកគេបានអះអាងថា ទីក្រុង Stockholm បានធ្វើការងារគ្រប់គ្រាន់ដើម្បីដោះស្រាយកង្វល់របស់ទីក្រុងអង់ការ៉ា។

លោក Erdogan បានរំលឹកឡើងវិញនូវការព្រួយបារម្ភរបស់លោក នៅថ្ងៃសុក្រសប្តាហ៍នេះ ដោយបានចោទសួរថា «តើប្រទេសដែលមានភេរវករនៅតាមផ្លូវរបស់វា ... អាចចូលរួមជាអង្គការណាតូបានដោយរបៀបណា»។

ទោះជាយ៉ាងណា ​លោក​ក៏​មិន​ច្រានចោល​ការ​ផ្តល់​ភ្លើង​ខៀវ​ឲ្យ​ស៊ុយអែត​ចូលរួម​ដែរ ដែល​លោក​នឹង​ពិភាក្សា​ការងារនេះ ជាមួយ​លោក​នាយក​រដ្ឋមន្ត្រី Ulf Christensen ក្នុង​កិច្ច​ប្រជុំកំពូលរបស់​អង្គការ​ណាតូ​នៅដើមសប្តាហ៍ក្រោយ។

លោកបាននិយាយនៅក្នុងសុន្ទរកថាតាមទូរទស្សន៍ថា «នៅក្នុងកិច្ចប្រជុំកំពូលនៃភាពជាអ្នកដឹកនាំនៅទីក្រុង Vilnius នៅថ្ងៃអង្គារសប្តាហ៍ក្រោយយើងនឹងពិភាក្សាអំពី (កង្វល់របស់ប្រទេសតួកគី) ជាមួយដៃគូរបស់យើង។ ទោះយ៉ាងណាក៏ដោយ យើងនឹងធ្វើការសម្រេចចិត្តដ៏ល្អបំផុត»៕