(ម៉ូស្គូ)៖ រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយនៅថ្ងៃសុក្រនេះថា ក្រសួងការពារជាតិរុស្ស៊ី នឹងបន្តសិក្សាពីសកម្មភាពជីវសាស្ត្ររបស់អាមេរិក នៅក្នុងប្រទេសអ៊ុយក្រែន ជាមួយនឹងការមានទិន្នន័យបញ្ជាក់ពីការងាររបស់ទីក្រុងវ៉ាស៊ីនតោន ក្នុងការអភិវឌ្ឍអាវុធប្រភេទនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ នៅថ្ងៃសុក្រ ទី៣០ ខែមិថុនា ឆ្នាំ២០២៣។
លោក Lavrov បានប្រាប់សន្និសីទសារព័ត៌មានតាមអនឡាញមួយថា ក្រសួងការពាររុស្ស៉ីបន្តផ្តល់ភស្តុតាងដល់សហគមន៍អន្តរជាតិជុំវិញបញ្ហានេះ ដោយគូសបញ្ជាក់ថា សហរដ្ឋអាមេរិកមានចេតនាពង្រាយបន្ទប់ពិសោធន៍ជីវសាស្ត្ររបស់ខ្លួននៅតាមតំបន់ផ្សេងៗ ធ្វើឱ្យវាកាន់តែលំបាកក្នុងការអនុវត្តយន្តការផ្ទៀងផ្ទាត់។
លោកបានសង្កត់ធ្ងន់ថា រហូតមកដល់ពេលនេះ ក្រុងវ៉ាស៊ីនតោនបាននិងកំពុងរារាំងយន្តការផ្ទៀងផ្ទាត់ ហើយនេះបង្ហាញថា កម្មវិធីជីវសាស្រ្តរបស់សហរដ្ឋអាមេរិកនៅក្នុងប្រទេសបរទេស មិនមែនមានន័យថា «គ្មានគ្រោះថ្នាក់» និង «គ្មានកំហុស» នោះទេ៕
