(តៃប៉ិ)៖ ក្រសួងការពារជាតិតៃវ៉ាន់ បានឱ្យដឹងថា យន្តហោះយោធាចិនសរុបចំនួន២៤គ្រឿង ត្រូវបានប្រទះឃើញនៅក្បែរ​កោះតៃវ៉ាន់ នាព្រឹកថ្ងៃសុក្រនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៣០ ខែមិថុនា ឆ្នាំ២០២៣។

ក្រសួងការពារជាតិតៃវ៉ាន់ បាននិយាយក្នុងសេចក្តីថ្លែងការណ៍ថា យន្តហោះយោធាចិនសរុប២៤គ្រឿង ក្នុងនោះមានទាំងយន្តហោះចម្បាំង និងយន្តហោះទម្លាក់គ្រាប់បែក ត្រូវបានប្រទះឃើញនៅក្បែរតៃវ៉ាន់ កាលពីវេលាព្រឹកថ្ងៃសុក្រនេះ គិតចាប់ពីម៉ោងខ្ទង់៨ព្រឹក។ នៅក្នុងចំណោម​យន្តហោះទាំងនោះ មាន១១គ្រឿងបានហោះឆ្លង ខ្សែបន្ទាត់មេដ្យាននៃច្រកសមុទ្រតៃវ៉ាន់ ខណៈនាវាចម្បាំងចិន៥គ្រឿង ក៏បានធ្វើប្រតិបត្តិការល្បាតផងដែរ។

គួរបញ្ជាក់ថា ក្នុងរយៈពេលប្រមាណជា៣ឆ្នាំចុងក្រោយនេះ កងទ័ពអាកាសចិន បានចល័តយន្តហោះរបស់ខ្លួនជាប្រចាំ ចូលមកកាន់ផ្ទៃអាកាស ដែលនៅជុំវិញកោះតៃវ៉ាន់ ហើយចាប់តាំងពីខែសីហា ឆ្នាំ២០២២មក ខ្លួនបានបញ្ជូនយន្តហោះយ៉ាងទៀងទាត់ ឱ្យហោះឆ្លងខ្សែបន្ទាត់មេដ្យាននៃ​ច្រកសមុទ្រតៃវ៉ាន់ថែមទៀត ដែលកាលពីមុន វាធ្លាប់ត្រូវចាត់ទុកជាព្រំប្រទល់មិនផ្លូវការ រវាងភាគីទាំងពីរ៕