(ប៉េកាំង)៖ អ្នកនាំពាក្យចិនបាននិយាយនៅថ្ងៃព្រហស្បតិ៍នេះថា ប្រទេសចិនជំរុញឱ្យសហរដ្ឋអាមេរិកឈប់ធ្វើអត្ថាធិប្បាយដែលមិនមានការទទួលខុសត្រូវ និងគោរពការប្តេជ្ញាចិត្តរបស់ខ្លួន ជាមួយនឹងសកម្មភាពជាក់ស្តែង។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ នៅថ្ងៃព្រហស្បតិ៍ ទី២៩ ខែមិថុនា ឆ្នាំ២០២៣។
លោកស្រី Mao Ning អ្នកនាំពាក្យក្រសួងការបរទេសបានធ្វើការលើកឡើងខាងលើ ជាការឆ្លើយតបនឹងការអត្ថាធិប្បាយរបស់រដ្ឋមន្ត្រីការបរទេសអាមេរិក លោក Antony Blinken ដែលបាននិយាយនៅក្នុងបទសម្ភាសន៍នាពេលថ្មីៗនេះថា «វាមិនមែនជារឿងសម្ងាត់ទេ ដែលមានភាពខុសគ្នារវាងសហរដ្ឋអាមេរិក និងចិន។ អាមេរិកនឹងបន្តការពារផលប្រយោជន៍ខ្លួន ប្រកាន់ខ្ជាប់នូវតម្លៃខ្លួន ហើយបន្តធ្វើ និងនិយាយរឿងដែលចិនមិនចូលចិត្ត»។
ចំពោះការអត្ថាធិប្បាយនេះ ក្រសួងការបរទេសចិនបានសម្តែងការប្រឆាំងរបស់ខ្លួន ដោយពណ៌នាវាថា ជាការអត្ថាធិប្បាយដែល «គ្មានការទទួលខុសត្រូវ» និងប្រាសចាកចេញពីបទដ្ឋានជាមូលដ្ឋាន ដែលគ្រប់គ្រងទំនាក់ទំនងអន្តរជាតិ។
លោកស្រី Mao បាននិយាយថា សហរដ្ឋអាមេរិកកំពុងបន្តអនុវត្តគោលនយោបាយខុសឆ្គង ចំពោះប្រទេសចិន ដែលកើតចេញពីការយល់ខុសចំពោះប្រទេសចិន ស្វែងរកការទប់ស្កាត់ និងគាបសង្កត់ប្រទេសចិន ព្រមទាំងធ្វើឱ្យខូចមុខមាត់របស់ប្រទេសចិន ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសចិន។
អ្នកនាំពាក្យរូបនេះបានបន្ថែមថា អ្វីដែលសហរដ្ឋអាមេរិកបាននិយាយ និងបានធ្វើ បានបំពានលើច្បាប់មូលដ្ឋានដែលគ្រប់គ្រងទំនាក់ទំនងអន្តរជាតិ។ ប្រទេសចិនមានហេតុផលគ្រប់យ៉ាងដើម្បីប្រឆាំងយ៉ាងម៉ឺងម៉ាត់។
លោកស្រី Mao បានលើកឡើងយ៉ាងដូច្នេះថា «ខ្ញុំចង់បញ្ជាក់ម្តងទៀតថា ការគោរពគ្នាទៅវិញទៅមក គឺជាគោលការណ៍មូលដ្ឋាន នៃបណ្តាប្រទេសដែលធ្វើពាណិជ្ជកម្មជាមួយគ្នា និងជាធាតុផ្សំដ៏សំខាន់សម្រាប់ប្រទេសចិន និងសហរដ្ឋអាមេរិកក្នុងការស្វែងរកផ្លូវត្រឹមត្រូវដើម្បីដើរទន្ទឹមគ្នា។ សហរដ្ឋអាមេរិកត្រូវបញ្ឈប់បញ្ចេញមតិដោយមិនទទួលខុសត្រូវ និងបំពេញការប្តេជ្ញាចិត្តរបស់ខ្លួន ជាមួយនឹងសកម្មភាពជាក់ស្តែង»៕
